रामलीला के बहाने जात रहैं सनीमा देखैं: राजू श्रीवास्तव

बताओ अब तो रावण जलि गा.. भरत मिलापो हुई गा.. बच्चा ई छूटकई यही लालच मा दै दीन्ह रहैं.. काहे से ऊ कहत रहे कि जब राम सीता की सवारी निकली तो आरती तुमहिं से करवाई जाई..। अभीन नरेसवा का दौड़ावा है कि अभीन जाय के लई के आव.. नहीं तो ई रामलीला मंडली वाले टेम्पो मा लाद के चल देहें.. ई आपन मोहल्ला के ननकऊ घोसी आएं जौन बड़े अगुवा बने फिरत हैं.. का मालूम कौने रामलीला मंडली लई के आवत हैं.. हर साल हमहीं लोगन से सब सामान मांगा करत हैं..। अरे पैसा लेत हैं ई मंडली वाले.. बच्चा ई साल 28 हजार रुपया लीन्हिन रहे हैं..।

पिछली बार बर्रा दुर्गा पार्क मा भई रही अखंड रामायण.. यही ननकऊ कराईन रहे.. ई ननकऊ आपन लौंडन के साथ आवा कि अरे जिज्जी चद्दर दई देव मंच पे पर्दा बनावे का है.. खैर हम कहा अखंड रामायण का मामला होय हम दुई चदरा दई दिहा.. कहिन दुई और दई देव.. ए बच्चा हमरे हिंया से चार चद्दर अउर तीन कुर्सी लई गे रहे.. ये ननकऊ घोसी चारों चद्दर तो लौटाइस पर तीनों कुर्सी तोड़ लावा..। 

तबहीं हमार नजर अंदर खटोला पे लेटे मामा केर लरिका मनीष पे पड़ी तो मामी से पूछा कि इनका का भवा.. ई काहे मुंह बाए परे हैं ? तो मामी बताईन कि अरे इनकी ना पूछो बच्चा.. ई कल रात से परे हैं.. तोहार मामा इनका खूब कूटिन हैं..। ई रोज रात मा निकलत रहे रामलीला देखे खातिर.. रात का आठ बजे साइकिल लई के जात रहे.. अउर लौटत रहे रात मा बारह एक बजे.. रोज आय के लीला सुनावत रहे कि आज यो भा आज यो भा..। हमहू कहा चलो रामलीला देखे जात है जाए.. ई तो हम लोगन का पुत्तू तिवारी बताये.. कि चाची तुम्हरा मनीस रामलीला के बहाने हीरपैलेस जात है सनीमा देखैं..।

इनके बाप का तो पहिले से पुत्तू बताय गए रहे.. इनसे पूछे कहा गए रहेव.. ई कहिन रामलीला देखे.. तोहरे मामा पूछीन कि आज का भवा.. तो ई कहिन लक्ष्मणशक्ति भई रही आज.. हनुमान जी गए हैं संजीवनी बूटी ले.. बस ई सुनत भये तोहार मामा इनका जूते से सूत दिहिन.. काहे से ई जब सनीमा देखत रहे तब अंधड़ तूफान आवा रहै.. हनुमान पार्क मा तो रामलीला केर तम्बू पिंडाल सब उड़ी गव रहा.. हम यहू सुना है कि बाबुपुरवा रामलीला केर रावण का पुतला मुंह बल गिरि पड़ा..। इनका सब भेद खुलि गा.. वही मा खूब कूटे गए हैं.. अब कहत हैं खाना देव.. हम कहा सनीमा वालन से मांगो जाए.. बूड़ा बाप आपन खून पसीना एक किये दे रहा है.. उई कमाय कमाय धरें अउर ई हुर्र हुर्र उड़ावें..। हम कहा मामी दई देव लरिका होय.. तो कहे लागीं कि लरिका होई तो का करेजा खवाय दई का.. इनके बप्पा मना किहिन हैं एका खाना दे से..।