पिक्चरों में देखि बेर पहाड़ में लगे हुन पडिग़ौ हो महराज कड़वचौथ

संस्कृत स्कूलक मास्साब और कर्मकांडी पंडितज्यू बसंत बल्लभ पाणेज्यूक कूंन छ कि कड़वचौथ त्यारकि खास मान्यता भै। उन बतूनांनकि छांदोग्य उपनिषद में लेखि रा कि जून में घरवाला रूपी ब्रह्मज्यूकि पूजपाठ करनैले सब्बै पाप खत्म है जान्य भय। कड़वचौथाक व्रत में शिवज्यू, पार्वती मैयां, गणेशज्यू, कार्तिकज्यू और जूनकि पूज करनी चैं। जूनकि पूज करनेक बाद माट्टक बन्योक कड़व में चूल, मास की दाल और सुहागकि सामग्री राखि बेर आपणी सासु या घरकि सजानि सुहागिनक खुट्ट छुई बेर सामग्री दिन चैं। 

आब पहाड़ में लगे लाग्र पडिग़ैछीन पूजाकि दुकान 
चंपावत। कड़वचौथ त्यार खन ली बैर आब पहाड़ में लगे पूज प्रसादकि सामानैकि दुकान लाग्र पडिग़ैछीन। कड़वचौथ खन सुहागिन सैणी करवा, छन्नी, सींक, कलेंडर और साज श्रंगारकि सामान खरीदनैछीन। चंपावत में अच्यालौ बरेली, टनकपुर, लखीमपुर, पीलीभीत बठै दुकानदार कड़वचौथकि पूजपाठकि सामग्री ली बेर आ रयान। इन दुकानदारोंक कूंन छ कि चार पांच साल बठि पहाड़ में लगे कड़वचौथ मनूनौक चलन बड़ि ग्यो।