दोस्तों पहिले लोग सफल होत रहैं.. प्रसिद्ध होत रहैं.. मगर आजकाल वायरल होत हैं.. पहिले अगर केहू का वायरल होत रहा तो रोना पिटना मच जात रहा.. अब कोऊ वायरल होत है तो पार्टी देत है.. जेका देखौ वहे वायरल होय के चक्कर मा चकरघिन्नी बना घूमि रहा.. कौनो फेसबुक व्हाट्सअप पे ज्ञान बघारि रहा तो कोऊ टिकटोक पे मुजरा करि रहा..
मतलब कइसे भी वायरल हुई जांय बस.. मगर इधिर चाइना मा एक ठो वायरस उधम जोते है.. कोरोना वायरस चाइना वाले कहत हैं कि उई लोग चार पैर केर चारपाई अउर कुर्सी छोड़ के सबै चीज खाय सकत हैं.. ई लोगे कुत्ता बिल्ली सांप बिच्छू कीड़ा मकौड़ा चमगादड़ सबै तल भून के खाय जात हैं.. वहै मा से कौनो जनावर केर वायरस हुंवा फईल गवा तो हुंवा सबकी बुद्धि सिंघाड़ा हुई गे..
अब ई वायरस आपन देस मा भी आय गवा है.. एकी दहिसत देखौ.. कल एक लौंडा कल्यानपुर से रामादेवी वाली 2 नंबर बस मा झकरकटी से चढ़ा.. बस मा भीढ़ बहुत रही तो उई झूठमूठ मोबाइल पे जोर से बोले लाग कि अरे यार हम आज सुबह चाइना से आय हन.. ओके मुंह से चाइना से आवे की बात सुनते ही लोगे चलती बस से कूदै लाग..
ऐके बाद उई लौंडा बस मा लुंगी बिछाय के लेट गवा अउर मूंगफली खात भये लेटे-लेटे रामादेवी गवा.. इधिर दिल्ली मा निर्भया केस मा फांसी की सजा पाय मुजरिम आय दिन नयी पुड़िया छोड़ देत हैं.. जिस से उनकी फांसी केर तारिख आगे बढ़ जात है.. हम तो कहब मीलार्ड ई जो बार बार इन हत्यारन केर फांसी टल रही.. ई ठीक नाहि.. यही कारण रहा हैदराबाद एनकाउंटर के बाद पूरा देस जश्न मनाईस रहै..
अरे भैया जल्दी लटकाव उनका.. अब अउर इंतिजार नाहि होत.. एक तो दिल्ली मा चुनाव होय वाले हैं.. ओके चक्कर मा हुंवा अलगे लबडधक्का चालि रहा.. सुने हैं कि केजरीवाल एक चुनावी सभा मा बोले दिल्लीवालों हम आप लोगन के लिए पूरी दिल्ली मा वाईफाई लगवाय दिये हैं.. पर ध्यान से सुनौ..
