छाजि रै छै छाजि रै छैत्यार हाथ में दाथुलि छाजि रै छै

छह दिनी आठूं महोत्सव में रविवाराक दिन लोहाकोट (देवलथल) गौंक महिला दल और सतगढ़ाक (कनालीछिन) पुरुष दलैलि संयुक्त रूपैलि चांचरी गायन करौ। तारा देवी ज्यूक नेतृत्व में आईं लोहाकोटक महिला दल और कैलाश चंद्र कापड़ी ज्यूक नेतृत्व में आईं सतगढ़ाक पुरुष दलैलि-छाजि रै छै छाजि रै छैत्यार हाथ में दाथुलि छाजि रै छै, देवी का मंदिरा जूंलो हाथ जोड़ी-जोड़ी, हाथ जोड़ी-जोड़ी हो स्वामी हाथ जोड़ी-जोड़ी, तिब्बतै है लामा आयो चामा-चामा आदि बोलनाक दगाड़ धूम मचै देछ। हुड़ुकैकि थापाक बीच लोहाकोटाक महिला दल और सतगढ़ाक पुरुष दलाक गायनैलि धूम मचै देछ।
येक बाद सतगढ़ैकि हिलजात्राक मंचन भ्योछ। हिलजात्रा में मां महाकाली अवतरण, हिरन-चीतल और बैलनकि जोड़ी विशेष आकर्षण छ्यो। हिलजात्राक बाद लीला वर्मा ज्यूक नेतृत्व में पितरौट और रेखा जोशी ज्यूक नेतृत्व में खड़कोटाक महिला दलैलि सिलग ढ़ि का पाला चाला गिन खेलन्या बॉल समेत अनेक बोलनाक बीच चांचरी गायन करौछ। ये है पैली आरसी पब्लिक स्कूल, पीएनएप स्कूल, ज्ञानदीप इंटर कॉलेज, नार्थराइड पब्लिक स्कूलाक दलनलि रंगारंग कार्यक्रम प्रस्तुत करिन। अहा रामलीला मैदान सदरकि रौनक देखते ही बणनै। आठूं कौतिकक संचालन जानीमानी उद्घोषक दीवान सिंह वल्दिया ज्यू रोचक ढंगलि करण लागि रईं।
हर साल हुंछ आयोजन
पिथौरगढ़ में हर साल श्री रामलीला प्रबंधकारिणी समितिक संयोजन में आठूं महोत्सवक आयोजन करी जांछ। आठूं कौतिक अपणि संस्कृति संरक्षण में अमूल्य योगदान दिण लागि रयोछ, ये में कोई संशय नी हांति। नई पीढ़ी कैं अपणि संस्कृतिक बार में जाणनाक मौक मिलनो। आठूं महोत्सवैकि रौनक साल दर साल बणन लागि रेछ। आठूं कौतिक में हजारों लोगनकि भीड़ उमड़न लागि रेछ।
--
यो लोग दिन लागि रईं योगदान
आठूं महोत्सवाक संचालन में श्री रामलीला प्रबंधकारिणी समितिक अध्यक्ष भूपेंद्र सिंह माहरा ज्यू, प्रबंधक नवीन भट्ट ज्यू, सचिव राकेश शाह ज्यू, उप सचिव राजेंद्र जोशि ज्यू, कोषाध्यक्ष दीपक नगरकोटी ज्यू, प्रमोद पाटनी ज्यू, अशोक पाटनी ज्यू समेत तमाम लोग लागि रई। यो लोग महोत्सवकि रौनक बणून में दिन-रात एक करन लागि रयान।
--
जेटली ज्यू, सुषमा ज्यू, पंत ज्यू, शाह ज्यू कैं दे श्रद्धांजलि
आठूं कौतिक में रविवार खिन आयोजकनाक तरफै शुरुआत में पूर्व वित्त मंत्री स्वर्गीय अरुण जेटली ज्यू, पूर्व विदेश मंत्री स्वर्गीय सुषमा स्वराज ज्यू, प्रदेशाक पूर्व वित्त मंत्री प्रकाश पंत ज्यू और रामलीला प्रबंधकारिणि समितिक दगाड़ लंब समय तक जुड़ी स्वर्गीय राजेंद्र लाल शाह ठुलघरिया ज्यूस श्रद्धांजलि दी गेछ। म्याल में आईं हजारों लोगनलि इन महान विभूतनाक स्मरण करौछ।

पिथौरागढ़ के रामलीला मैदान में आंठू खेल लगाते महिला-पुरुष। अमर उजाला- फोटो : PITHORAGARH