रंगील चंगील कार्यक्रमोंक दगाड़ मोस्टामानू म्यालक समापन

केंद्रीय कपड़ा राज्यमंत्री अजय टम्टालि कौछ कि भगवान मोस्टामानूक म्याल भौते पुराण छू। बरखाक द्याप्त भगवान मोस्टामानूक म्यालाक संरक्षणक प्रयासैकि जतू ले तारीफ करी जावौ उ कम छू। पूर्व जिला पंचायत अध्यक्ष वीरेंद्र बोहरा और म्याल समिति, मंदिर समितिक लोग म्यालैकि पछ्यांण बणाई राखन में लागि र्रइं, यो भौंत सराहनीय छू। भगवान मोस्टामानू सबूनक भल कराल। मंत्रील कौ कि म्याल पहाड़ैकि संस्कृतिक पछ्यांण छन। म्यालाक संरक्षणक लिजी जो ले मदद है सकलि उ करी जालि। विशिष्ट अतिथिक भाजपा नेता सुरेश जोशी, पूर्व पालिकाध्यक्ष राजेंद्र रावत और 119 इंडीपेंडेंट ब्रिगेड ग्रुपक ब्रिगेड कमांडर सेना मेडल ब्रिगेडियर राकेश मनोचालि महोत्सवैकि खूब सराहना करी।

समापनाक मौक पर लोक गायक प्रकाश रावत और उनरि टीमैलि भौते रंगील चंगील कार्यक्रम दिखाईं। मल्लिकार्जुन स्कूल, एशियन स्कूल, पीएनएफ स्कूलाक नानतिनालि एक है बढ़ि बेर एक प्रस्तुति देछ। म्याल समितिक संरक्षक पूर्व जिला पंचायत अध्यक्ष वीरेंद्र बोहरा, मंदिर कमेटीक अध्यक्ष गणेश दत्त कांडपाल, महासचिव सुभाष फुलेरा, सह संयोजक राजेंद्र कांडपाल, तुलसी प्रसाद पांडेय, ललित मोहन धानिक, चंद्र सिंह, ढूंगा गौं कि प्रधान विमला देवील सहयोगाक लिजी सबनक आभार जता। कैप्टन दीवान सिंह वल्दिया और जनार्दन उप्रेती जन्नू दालि भौते भल मंच संचालन करौ। अघिल साल फिरि भेटूंल कै बेर सबै लोग अपण-अपण घर ही गईं।

ऐंण प्रतियोगिताकि धूम
मोस्टामानू म्याल में ऐंण (पहेली) प्रतियोगिताकि ले धूम मची रै। आपणि बोलि भासाक संरक्षण में लगा रईं जनार्दन उप्रेती जन्नू दा लि संचालन करौ। एेंणक सही जबाव दिनेर वालन कैं इनाम दी गईं।