हमरे गुरु एक्कै थप्पड़ मा नेटवर्क पकडाय देत रहैं- राजू श्रीवास्तव 

भईया ई साल बारिश तो आतंक मचाय है.. असाम बिहार महाराष्ट्र सब जगह लोगे ई  बरसात से परेसान हैं.. एक बात समझि मा नाही आवत है कि भारी बरसात मा कानपुर केर बिल्डिंग गिरत है मगर गांव के कच्चे मकान नाही गिरत हैं.. आज हम ज्ञान बांटे केर मूड मा हन.. पहिला ज्ञान दई दिया अब दूसर सुनौ.. बरसात के मौसम मा हाथ खींच के खाव पियो.. अईस मौसम मा बाहर का खुला अउर बासी खाय पिए केर सामान तो एक्दमै छुवे वाला नाही..

अभीन हफ्ता भर पहिले आपन कानपूर मा अईस भयंकर बरसात भई रही कि तमाम ट्रेन कैंसिल हुई गयी रहीं.. झकरकटी बस अड्डा पे भी पानी भरा रहा.. रेलवे स्टेशन अउर बस अड्डा पे खाय पिए का सामान बेचे वालन मा कुछ कमीने लोग रहे जो कालाबाजारी करे लगे.. बताव पचास पचास रूपये केर चाय बिकत रही.. खाय पिए की अईस तकलीफ़ रही कि समोसे अउर पूडी सब्जी खातिर बोली लगत रही.. हम कहा दूसर केर तकलीफ का जो फायदा उठावत है उससे बुरा कोऊ नाही..

इन लोगन का एकी सजा मिलि.. अब लेव तीसर ज्ञान.. मुफत मा बांट रहे हन.. अउर तीसर ज्ञान ई है कि आजकाल फोन पे ठगी करे वाले लोग बहुत सक्रीय हैं.. इनसे बहुत सावधान रहै की जरूरत आय.. ई लोगे फोन करि के कहत हैं कि आपका कार्ड ब्लाक हुई गवा है सुनि के आदमी भड़भड़ा जात है  घबड़ाया भया आदमी एक एक करि के आपन कार्ड नंबर, वैधता, कार्ड समाप्ति अवधी, पिन पासवर्ड सब बताय देत है..  थोड़ी देर बाद आपके मोबाइल पे मैसेज आवत है कि आपके खाते से आपका सारा पईसा साफ हुई गवा..  

तो भईया कबहूंं भी केहू का भी आपन बैंक केर या डेबिट क्रेडिट कार्ड केर जानकारी नाही दिहेव.. वरना ई लोगे तुम्हरे खाते मा झाड़ू मार देहें ...अब तो आपन कानपूर मा साईंबर क्त्रसइम केर अलग विभाग भी आय.. अच्छा एक बात हमरे समझ मा नाहि आवत है कि ई बैंक वाले ओका कर्जा काहे नाहि देत हैं जेका जरूरत होत है.. अउर जिनका कर्जा नाहि चाही.. ओके पीछे पड़े रहत हैं कि कर्जा लई लेव कर्जा लई लेव.. हर पांच मिनट मा मोबाइल पे मैसेज आत है...

अउर लड़कियां सुन्दर सुन्दर आवाज मा कॉल करि करि के नई नई स्कीम बतावा करत हैं  अरे भईया लोन उनका देव जिनका जरूरत है.. जरूरतमंद का लोन दे मा इन बैंक वालन की जान जात है.. अउर मान लेव अगर ई कौनो जरूरतमंद का लोन देवे खातिर राजी हुई भी गे तो इत्ता दौड़ावत हैं अउर इत्ते कागज़ मांग लेत हैं कि आदमी के दस्त लग जांय.. ई सिस्टम सही होय के चाही.. अउर हां फर्जी कॉल से याद आवा कि अभीन परसों आपन नील वाली गली के संतोस रात मा 11 बजे आपन गली मा घूमत रहे.. हम कहा हुआ बे..  तो संतोस बताईन कि अनजान नम्बर से हमरे मोबाइल पे एक कॉल आवा..

कौनो फीमेल आवाज रही.. हमसे पूछिस आप सादीसुदा हौ.. हम जनानी आवाज सुनि के मस्तीयाय के कहि दिया कि नाही.. हम सादीसुदा नाही हन.. अउर आप?.. तो उधिर से जवाब आवा घर आव तो बताईत है.. यही मारे अभीन तलक गली मा घूमि रहे हन.. तोहार भाभी तो आज हमरी जान लई लहे.. फिर हम संतोस का जुगाड़ बतावा.. हम कहा ई तुम्हरा फोन देव हमका अउर तुम शान से घरे जाव.. जब भौजाई कुछु पूछे तो साफ मुकरि जाव कि हमका का मालूम..

हमरा फोन तो दुपहरै मा हेराय गवा रहै.. तुम केहू अउर से बात किये हुईहौ.. फिर कल संतोस हमसे आपन मोबाइल वापस लिहिन अउर हमका बताईन कि हमरा जुगाड़ काम करि गवा.. अभीन बुधवार का गुरु पूर्णिमा रही.. भईया हमार बचपन मा ई 3 जी 4 जी नाही होत रहे.. सिरिफ गुरु होत रहे.. जो एक्कै थप्पड़ मा नेटवर्क पकडाय देत रहैं..लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..।