ठंड केर एक फायदा ई है.. कि गरमी नाहीं लागत है: राजू श्रीवास्तव

दोस्तों ठंड केर मौसम सुरू हुई गवा है.. आज काल ठंड तो अइसे पड़ रही है जइसे कल ओका एग्जाम होय.. कल तो अईस कंकाला ठंड रही कि सोचा योगी जी से बात करि के दिसंबर महीना केर नाम जून करवाय दें.. मगर गुरु एक बात है..

ठंड के मौसम मा मजा बहुत आत है.. ठंड केर सबसे बड़ा फायदा ई होत है कि गरमी नाहीं लगत है.. वइसे ठंड केर मौसम का एक अउर फायदा ई है कि छत पे बइठ के धूप भी सेंक सकत हैं अउर आंखें भी.. अउर हमरा आज का विचार ई है कि इंसान का जितनी चादर होय उतना ही पैर पसारे का चाहि..

नाहीं तो ठंड लगत है भईया!!.. देखो भईया कहे वाली बात आय.. मगर केहू से कहेव नाहीं.. काहे से भगवान् केर घर मा देर होय मगर अंधेर नाहीं.. अब देखो गरमी केर मौसम मा हम भगवान से प्रार्थना किये रहन कि भगवान् हमरी छत पे रखी पानी केर टंकी का पानी उबल रहा है ओका ठंडा करि देव.. उई प्रार्थना भगवान अब जाय के सरदी में सुनिन हैं..। अइसे मा हमका दीवार फिलिम का मसहूर डायलाग तोड़े का मन होय रहा है कि आज हमरे पास बाल्टी है.. मग्घा है.. नल है.. बस नहाय केर हिम्मत नाहीं ना..

वइसे दोस्तों आज काल ठंड मा बॉडी स्प्रे अउर परफ्यूम केर बिक्री जोर पे है.. जो लोग नहात नाही हैं उनके लिए यही परफ्यूम स्प्रे तारणहार होय.. ऐसेहे रायपुरवा के हमरे मित्र है पंकज.. परसों हमका मिले तो जबरदस्त महकत रहे.. हम कहा यार जबर महेक रहे हौ गुरु.. चाय मा इतर डाल के पिए हौ का.. तो पंकज मुस्कीयावत रहे.. ऊ तो हमका पुत्तू बताये कि ई महिना भर से नहाय नाही हैं.. इतर परफ्यूम अपने उप्पर उडे़ल के घर से निकलत हैं..

वइसे भईया अब वो समय आय गवा है जब सुबह उठ के जिंदगी का सबसे बड़ा अउर मुस्किल फैसला करे का पड़त है.. कि आज नहावा जाय कि नाही !!.. वइसे ठंडी के मौसम मा नहावे से पहिले इन्सान ‘साइलेंट मोड’ पर होत है.. फिर नहात भये ‘लाउड मोड’ पे होत है.. अउर नहाय के बाद ‘वाईब्रेंट मोड’ पे.. कल हमहूं सोचा कि चलो आज नहावा जाय पर तबहीं टीवी पे न्यूज आवत रही.. ओमा बताईन कि आज ठंड से चार लोगन की मौत हुई गयी.. हम कहा भगाओ यार.. जान है तो जहान है भईया.. जिंदगी रही तो गरमी मा नहा लेबे..

अब आजै की बात लई लेव.. सुबह सुबह हमरे पड़ोस मा अचानक चीखे चिल्लावे की आवाज आवे लगी तो हम भाग के बाहर आय के पूछा का भवा.. तो पता चला ननकू की अम्मा ननकू का उठावे खातिर उसके उप्पर ठंडा पानी डाल दिहिन रहे.. कहत रहीं मनहूस बारह बजे तक सोवा करत है.. हम कहा सही बात है मगर ई मौसम मा कौनो का ठंडा पानी डाल के उठाना कौनो आतंकवादी हमले से कम नाही.. ऐसेहे दर्शनपुरवा मा बिज्जू तिवारी कूट दिए गए..

हुआ ई रहा कि मुन्नन पहलवान बीघापुर बाजार करे गए रहे.. लौट के घर आये तो बहुत थके रहे.. तो ई बिज्जू उनसे कहे लागे कि नहाय लेव तुम्हरी सारी थकान उतर जाई.. वही बात पे मुन्नन बिज्जू का सूत दिहिन कि साले हमका ऊपर पहुंचावे का रास्ता बताय रहे हौ.. मुन्नन उनका उठाय के पटक दिहिन..। 

वइसे हम सुना है कि केंद्र सरकार इस भयंकर ठंड के मौसम मा कुछ बड़े फैसले लेवे वाली है.. जइसे इस सरदी के मौसम मा नहाय वाले को वीरता पुरस्कार से नवाजा जइहै.. अउर नहाय भये आदमी को छुवे वाला व्यक्ति भी नहाया भया माना जइहै.. अउर इस भयंकर ठंड मा कौनो की रजाई खींचना देशद्रोह के बराबर माना जइहै.. अउर सोशल नेटवर्क आदि पे इस ठंड के मौसम मा गुड मार्निंग संदेश दोपहर 1.00 बजे तक स्वीकार किए जइहै..

वइसे ई ठंड के मौसम मा एक जादू मतलब स्पेशल मैजिक ट्रिक बताई?.. देखो आप सुबह सात बजे उठौ.. अउर फिर एक अंगड़ाई लई के पांच मिनट के लिए फिर सोय जाओ.. अउर जब आप पांच मिनट बाद उठिहौ तो घड़ी मा देखौ नौ बजे होईं.. वइसे सरदी के मौसम मा दारूबाजी भी जम के होत है.. मगर हमरी पियक्कड़ भाइयो से रिक्वेस्ट होय कि इस भयंकर ठंड के मौसम मा जादा हपक के दारु ना पियो गुरु..

वरना कहूं पी पा के लुढ़क गए तो होश मा लाये खातिर भाई लोग बाल्टी भर ठंडे पानी से नहींला देहें.. तोहरा नसा तो उतर जाई.. मगर फिर ठंडी ना उतरी.. अउर दोस्तों ढलते दिसंबर के साथ हमार गलतियों का माफ कर दिहेव.. का पता अगले दिसंबर मा आप रहौ ना रहौ..लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..