हैदराबाद कांड पर बोले राजू श्रीवास्तव, बचाव मा मारिन तो बढ़िया.. जानबूझ के मारिन तो अउर बढ़िया

दोस्तों ई हफ्ता बहुतै अजीब गवा.. बताव कल सुबह दिल्ली के फिल्मिस्तान एरिया मा आग से जल के पचासन लोगन की दर्दनाक मौत हुई गयी.. इधिर रूरा की पंद्रह वर्षीय सामूहिक बलात्कार पीड़िता फांसी लगाय लिहिस.. ऊ पुलिस द्वारा आरोपियन पर कौनो कार्यवाही ना होय से क्षुब्ध हुई के अईस दर्दनाक कदम उठाय लिहिस.. हमरी समझि मा ई नाहि आय रहा कि ई सब चलि का रहा.. इन सबके चलते पूरे विश्व मा आपन देस की बड़ी बदनामी होत है..
 

अभिन कुछ दिन पाहिले हम मलेशिया गे रहन तो हुंवा सब पंचे हमका घेर के पूछे लगे कि आपके देस मा तो बड़ी जल्दी जल्दी फटाफट रेप होत हैं.. इण्डिया घूमे जाय वाला है.. हम हुंवा सुरक्षित रहब?.. हमका उन सबै लोगन की बात सुनि के बहुत शर्मिंदगी भयी.. मगर इन सबै दुखद मामले के बीच मा हैदराबाद रेप केस केर चारों आरोपियन का हुंवा की पुलिस एनकाउंटर मा ढेर करि दिहिस.. सही बताई तो कौनो के मरे पे हमका कभूं अच्छा नाहि लगा पर इन चारों हैवानन की मौत पे मन प्रसन्न हुई गवा रहै.. बचाव मा मारिन तो बढ़िया.. जानबूझ के मारिन तो अउर बढ़िया।

इधिर उन्नाव रेप केस केर पीड़िता का आरोपी लोगे जिन्दा जलाय दिहिन.. बहुत बहादुरी से लड़ी बिटिया मगर बिचारी मौत के आगे हारि गयी.. आपन मुख्यमंत्री ई केस का फास्ट ट्रैक कोर्ट मा चलाय जावे का आदेशौ दिहिन.. इधिर अखिलेश यादव अउर प्रियंका गांधी ई घटना का लई के धरने पे बईठ गे.. हमका प्रियंका गांधी की यू बात बढ़िया लागत है कि ऐसे मौके पे उई छे सात औरतन के साथ सर पे पल्लू लई के कहीनो बईठ जाति हैं..

अरे कभों बिना कौनो दुर्घटना के भी आवें.. खिचड़ाही मा आवें.. गुडिया मा आवें.. सकठ मा आवें.. कौनो के मुंडन पे आव कभों.. खैर दोस्तों आजकाल सादी बियाह का सीजन चालि रहा.. हम एक बात नोटिस किये हन कि आजकाल सबै बरात लेट अवती हैं..  बस वाले भी एक दिन मा चार चार पांच पांच बरातें निपटाय रहे हैं.. अउर भईया सरदी केर सहालग मा सादी बियाह का ना पूछौ.. कुछौ खालीहे नाही मिलत है.. अउर भईया घोड़ी केर बात तो पूछौ नाहि..

हमका रत्तूपुरवा वाले संकठा बताईन कि ई घोड़ी वाले घोड़ी कि जगह गधा सप्लाई करि देत हैं.. ई लोग गधे के उप्पर चद्दर अद्दर उढ़ा देत हैं ठंडी मा सब बाराती पी के टुन्न रहत हैं तो अइसे  मा चद्दर को उठाय के देखत है कि अन्दर घोडा आय कि गधा.. हमाय दोस्त संतोस एक बरात मा गे रहैं.. नाचत नाचत करे लगे मुआयना.. फिर गुड्डू से कान मा कहिन अरे गुड्डू.. ई तो वही है.. घोड़ी वाला सनक गवा की पोल खुलि जाई.. कहे लाग भईया दूर होय के नाचौ..

घोड़ी मरकही आय.. घोड़ी वाला इनका एक क्वार्टर पकड़ाइस अउर कहिस कि भईया उधिर जाय के मौज लेव.. अबकी आप कौनो बरात मा जाव तो ध्यान दिहेव कि बैंड मा कुछ लोग सच्ची मा बजाय वाले होत है अउर बाकी नौसिखिये रहत है.. जिनका कुछु आत नहीं है बस पपीरी भोंपा पकडे रहत हैं। बैंड वाले का करत हैं कि सहालग मा मेस्टन रोड अउर किदवई नगर चौराहे से मिस्त्री अउर लेबर पकड़ लात हैं अउर उनका बैंड वाली ड्रेस पहिनाय के हाथ मा पपीरी भोंपा पकडाय देत हैं।
 

वइसे सरदीयन की शादी मा भईया जो एक बार रजाई मा घुसि जात है ऊ बाहर नाहि निकलत है.. मगर एक रहस्य आज तक समझ मा नाही आवत है कि पारा माइनस पे चलि रहा है और इन औरतन का ठंडी काहे नाही लगत है..लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है।