गुटखा, सिगरेट की खातिर कनपुरिया तोड़ि रहे लॉकडाउन- राजू श्रीवास्तव

जो कहत रहैं कि मरै की भी फुरसत नाही.. उई आज मरे के डर से फुरसत मा घरे बईठ हैं.. दोस्तों पूरे देस मा लॉकडाउन चलि रहा.. अगर मई अउर जून मा रसीले आम खावे चाहत हौ तो पूरे अप्रैल घरे पे आराम करौ.. नाही तो तुमका तो आम खावे का ना मिलि पर बाकी सबका तेरहवीं खाय का जरूर मिल जाई.. आजकाल सबकी जिंदगी एकदम ‘बिग बॉस’ के जइसी चालि रही.. सब लोगे पूरा दिन घरे पड़े रहत हैं अउर अचानक मोदी जी बिग बॉस के जइसे आय के TASK दई के चले जात हैं..

अईस प्रधानमंत्री पहिले कभूं ना मिला है.. बताव अईस खौफ के माहौल मा भी त्यौहार जईसी स्थिति पैदा कर दिहिन.. उई कहत हैं कि थाली बजाव.. तो भाई लोग परातें-तसला फोड़ देत हैं.. उई कहत हैं दिए जलाव.. तो भाई लोग बम पटाखे फोड़ देत हैं.. ई परंपरा तो अनादि काल से चलि रही.. प्रभु राम हनुमान जी से कहिन हनुमान.. मैया का पता लगाय के आव.. हनुमान जी लंका फूंकि आय.. प्रभु कहिन कि संजीवनी बूटी लै आव.. हनुमानजी पूरा पहाड़ उठाय लाय..।

 

वइसे हमार मोदीजी से अनुरोध आय कि अबकी रविवार का चीन को गालियां दे वाला प्रोग्राम भी राखि देव.. वईसे हमाई सरकार से एक ठो बहुतै नम्र विनती आय कि नाई लोगन का सैलून भी रोज एक घंटा खातिर खोले देव.. काहे से हमरी दाड़ी अउर बाल अईस बमपिलाट बढ़ि गए हैं कि कल हम सब्जी ले बाहर निकलेन तो एक अति उत्साही समाजसेवा करे वाले हमरे हाथे मा पूड़ी सब्जी केर पैकेट पकड़ाए दिहिन.. ओके बाद सेल्फी लई के फेसबुक इन्स्टाग्राम पे पोस्ट करि दिहिन..

 

हमसे कहे लाग ‘बाबा हम लोग आपका भूखे नाही मरे देब’.. घरे पहुंचेन तो हमाई पत्नी हमरे उप्पर अलग चिल्लाय लगीं कि तुम सब्जी ले गये रहेव या पूड़ी सब्जी खाय गए रहेव?.. अरे इन औरतन का ना पूछौ.. बताव पूरा देश कोरोना के टेन्शन मा हैं अउर ई औरतें FB पे ‘Challenge Saree’ खेलि रही हैं.. ईं लोगे एक्दमै दिमाग का दही करि दिहिन हैं.. चलौ अब बात करि आपन कानपूर अउर कनपुरियन की.. पूरे विश्व मा जितने डॉक्टर जेतनी गंभीरता से कोरोना केर इलाज खातिर दवाई ढूंढ रहे हैं..

 

उससे जादा हमरे कनपुरिये पूरे कानपूर मा गुटखा.. सिगरेट अउर दारू ढूंढ रहे हैं.. एके चक्कर मा कुछ कनपुरिये कर्फ्यू होय के बावजूद बाहर घूमि रहे हैं.. खैर पुलिसौ अईस लोगन की खातिर तवाजोह मा कौनो कमी नाही करि रही.. ई कोरोना पहिली अईस बिमारी आय जेका इलाज डॉक्टरन से जादा पुलिस करि रही.. रोड पे रंगबाज लोगन की अईस ठुकाई चलि रही कि लगत है ‘सैनेटाईजर’ के बाद ‘बाम’ केर किल्लत होय वाली है.. एक तो ई कोरोना के चक्कर मा हम लोगन की जिंदगी मा सेनेटाइजर अईस घुसि गवा है कि का बताई..

 

मतलब सेनेटाइजर से बार बार हाथ धोय से धन वाली लकीर धुंधली होत जाय रही.. अउर अगर सेनेटाइजर से हाथ ना धोएं तो उमर वाली लकीर फीकी दिखे लगत है.. मतलब कहा जाई.. कईसे खुजलाई.. कुछौ बिलगाय नाही रहा.. सही बतायं तो बीस दिन हुई गे घरे मा बंद.. अब तो थोड़ा सा मन हमरौ करि रहा कि बाहर दुई मिनट का चक्कर लगा आई.. मगर बाहर पुलिस केर ‘लाठी कीर्तन-पूजन’ चालि रहा तो हिम्मत नाही पड़ रही..

 

अरे आज तो हमार तकिया अउर बिस्तरौ बोलि पड़ा कि ‘साहब उठ के कहूं अउर बईठ जाव तो हमहूं लोग तनिक सांस लई लें.. वइसे घर मा रहि के हम खूब लूडो खेलि रहे हन.. लूडो खेलत खेलत एक ज्ञान भवा कि जौने गोट घर मा रही.. ओका कोऊ नाही मारि सकत.. मरे-मारे वाली बात से याद आवा कि संकठा खूब तबियत से कूटे गे.. मोदी जी कहिन रहैं कि इतवार का रात नौ बजे नौ मिनट खातिर सब लाइट बंद करि दिहेव.. ई संकठा जोश जोश मा आपन घर के बगल वाले हॉस्पिटल की लाइट बंद करि दिहिन..

 

इससे कई वेंटीलेटर वाले मरीज ऊपर जात जात बचे.. वईसे हम सरकार से एक ठो निवेदन करे के चाहित है कि ई मुकेश अंबानी का चिकित्सा क्षेत्र मा नोबेल पुरस्कार मिले का चाहि.. काहे से उई सब भारतीयन का 4G इंटरनेट दई के अईस lockdown की हालत मा करोड़ों लोगन का पागल होय से बचाईन हैं..!! लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है।