गरमी मा भी नाही मरा.. ठंडा पाउडर लगाय के घूमि रहा कोरोना- राजू श्रीवास्तव

दोस्तों अजब चलि रहा.. मतलब एकदमै गजब चलि रहा.. बताव चांद अउर मंगल पे जीवन ढूंढें वाला इंसान आज पृथ्वी पे स्वयं केर अस्तित्व ढूंढें खातिर तड़प रहा.. ये अजब दौर आय..  एमा जो बीमार आय.. उई अकेला रही.. अउर जो अकेला रही.. ऊ बीमार नाहि होई.. वाह प्रभु तेरी लीला गजब आय.. आज से पांचवां लॉकडाउन सुरू हुई गा.. हम माननीय मोदी जी से कहा रहै कि पांचवां लॉकडाउन लगाय की तकलीफ ना करें.. काहे से घरे बईठे-बईठे अब हम खुदै इत्ते आलसी हुई गे हन कि हम खुदै बाहर ना निकलब..

 

वइसेहे ईत्ती गर्मी आय कि को बाहर जाई.. बताव अईस लॉकडाउन मा इन्सान एक मोहल्ले से दूसर मोहल्ले नाहि जाय पा रहा.. अउर ई टिड्डे साले वर्ल्ड टूर पे निकले हैं.. वइसे सुने हन कि टिड्डी दल का रुख चीन की तरफ होय की खबर सुन के पूरे चीन मा खुशी है.. हुंवा सब पंचे आपन आपन मुंह खोले बालकनी मा खड़े आंय.. वइसे चीन से एक खबर अउर आई है कि राष्ट्रपति शी जिनपिंग हम सब भारतीयन से कहि रहे हैं कि अगर हम लोगे भारत मा मौजूद सारे टिड्डे खाय जाएं तो का हम लोगन का कोरोना खातिर माफ कर देहौ..??..

 

हम तो कहित है कि एका ‘टिड्डा पुलाव’ की दावत दई के बुलाय लेव.. फिर हम कनपुरियन के हवाले करि देव.. एका कंबल उड़ा के हउका जाए.. बताव जिंदगी झंड हुई गे.. ई कोरोना.. चीन.. गैस-लीक.. टिड्डी.. भूकंप.. अम्फान.. मंदी अउर बेरोजगारी आदि के बाद जो कोऊ बचि के 2021 मा चला जाई.. ओके माथे पे स्टंप लगाई जइहै.. TESTED OK.. अभीन कल हमाय मोहल्ले मा दुई लोग बहस करत रहैं.. फिर हम उन लोगन का समझावा.. कि कोऊ तुम्हरे सपोर्ट मा ना आई.. आत्मनिर्भर बनौ.. तब जाय के मारपीट शुरू भयी..

 

अब ई लॉकडाउन मा कुछ मनोरंजनौ होय के चाहि.. वइसे हमरे कंपू मा सोशल डिस्टेंसिंग का लई के सब लोगे इत्ता गंभीर आंय कि अभीन परसों खपरा मोहाल मा तीन लड़कन का 12-15 लोग इकट्ठा होय के सोशल डिस्टेंसिंग का पालन करे के बारे मा समझावत रहैं.. वइसे दुनिया में तीन तरह के लोग होत हैं.. पॉजिटिव.. निगेटिव.. रिलेटिव.. अउर तीसरे नंबर वाले दुइनो का खेल खतम करि देत हैं.. बताव पहिले कहत रहैं कि निगेटिव लोगन से दूर रहौ.. अब कहत हैं कि पॉजिटिव लोगन से दूर रहौ..

 

काश जौने स्पीड से रानू मंडल आई रही अउर फिर चली गयी रही.. वइसेहे ई कोरोना वायरस भी चला जात तो अच्छा रहत.. अभीन तलक नाही मरा.. लोगे कहत रहैं कि ई कोरोना गर्मी मा मरि जाई.. मगर अईस लगत कि Dermi Cool लगाय के घूमि रहा कमीना..!! कुछ लोगे अभीनो कहि रहे कि कोरोना अगर अईस भीषण गर्मी मा भी नहीं मरा तो बरसात के पानी मा डूब कर मरि जाई.. कुछ कहि रहे कि धैर्य रक्खौ.. अगर बरसात मा डूब के नाही मरा तो ई कोरोना दिसंबर की ठंड मा ठिठुर के मरि जाई.. ठंड मा भी बचि गवा तो अगली गरमी नाही झेल पाई..
 

सुना आय कि जौने वैज्ञानिक घोषणा किहिन रहैं.. कि तापमान बढे़ के साथ-साथ ई कोरोना वायरस भी मरि जाई.. उई वैज्ञानिक कल लू लगे से मरि गा.. वइसे प्रभू की लीला देखौ जब हवा साफ भयी तो मास्क पहिनाय दिहिन.. अब तो अईस लागि रहा कि कान का डिजाइन भगवान् मास्क पहिने खातिर ही बनाईन रहैं..!! इधर ई कोरोना के चक्कर मा सब शादी बियाह बंद आंय.. खैर एका इत्ता दुख नाही.. जित्ता दुख ई बात का है कि प्रीतिभोज बंद हुई गा.. चाट पकौड़ी.. दही रायता अउर पलेट भरि के गुलाब जामुन बहुत याद आय रहे.. वइसे अब शादी बियाह की इजाजत तो मिलि गे..

 

मगर बहुत कम लोग शामिल हुई सकत हैं.. पता चला कुछ दिन बाद लोग बोलिहैं कि जित्ते लोग तोहरी शादी मा आय रहैं.. हमाय टाइम मा उससे ज्यादा लोग तो मुंह मुंह फुलाये घूमते रहैं.. अरे जित्ते लोग टोटल तोहरी शादी मा रहैं.. उससे जादा लोगे तो हमरी शादी मा खाना बनाय वाले रहैं.. अउर भईया ई 2020 मा आपके कौनो रिश्तेदार के हिंया शादी मा अगर आपको निमंत्रण नाही आत है तो समझ जाव कि Top-50 रिश्तेदारन मा आपका नंबर नाही है.. वइसे ई कोरोना काल पूरी दुनिया का इंसानियत का पाठ पढ़ाए दिहिस.. आज कौनो कोरोना टेस्ट करावत है तो पूरा मोहल्ला ओकी सलामती की दुआ मांगत है.. समझदार लोग समझ गए हुईहैं..!!