नागिन सीरियल खातिर प्रयाग केर होटल मा फईल गै संकठा: राजू श्रीवास्तव

दोस्तों पिछले हफ्ते हम बताये रहन कि हम संकठा, पुत्तन, मनोहर अउर संतोस केसरवानी गे रहन कुंभ मेला.. जहां पुत्तन हेराय गे रहैं.. हम सब पुत्तन का ढूंढें मा लगिगेन.. एक तो पुत्तन ठहरे पुरान मानसिकता वाले..

मोबाइल उबाईल रखत नहीं हैं.. हम सबै लोग उनका ढूंढें मा परेसान हुई गे.. पुत्तन का ढूंढत ढूंढत हम लोग संगम किनारे पहुंच गेन.. तबहीं शोर मची गा.. आदमी डूब रहा.. आदमी डूब रहा.. हम भाग के उस तरफ गए कि कहूं पुत्तन तो नहीं आंय..

उई चिल्लावत रहा हमका तैरना नाही आत.. हम तैर नाही पावत है.. बचाओ.. वहीं एक बौड़म आदमी खड़ा.. उई उस डूबे वाले आदमी से कहे लाग कि यार तुम अजीब लौझड़ आदमी हौ.. अइसे तो हमहूं का बहुत कुछ नाही आवत है.. हमका हवाई जहाज उड़ावे नाही आवत है..

गिटार बजावे नाही आवत है.. पर हम कबहूं नाही चिल्लाए कि हमका नाही आवत है.. तो हम उस आदमी से कहा भइया ई पानी मा डूब रहा है अउर आप ओका बचाए के बजाय वार्तालाप करि रहे हौ.. खैर फौरन लाइफ गार्ड लोग आय के ओका बचाय लिहिन.. हम लोग फिर पुत्तन का ढूंढें मा लगि गे.. तबहीं हम लोगन का पाटन केर दरोगा शुकुल जी मिलि गे.. कहे लाग काहे भौंचक घूमि रहे हौ.. हम लोग उनका बतावा कि पुत्तन हेराय गे हैं..

तो दरोगा जी कहिन हुंवा सामने एक ठो शिविर होय.. खोया पाया केंद्र .. हुंवा चले जाओ.. मिल जइहैं.. नाही मिलें तो अलाउन्स्मेंट करा दिहेव.. हम लोगे भागि के हुंवा गे.. पुत्तन नाही मिले.. अलाउंस के बाद भी नाही मिले.. ओके बाद हम लोगे पहुंच गेन एक अखाड़ा मा.. हुंवा नागा लोग आग केर अंगारन पर चलत रहें.. हुंवा पुत्तन बड़ा ध्यान से साधू लोगन का देखत रहें.. हम कहा यार पुत्तन तुम अजीब टोपा आदमी हौ..

तुम हिंया ठेक खाए हौ अउर हम लोगे तुमका पूरे मेला मा हेरत रहेन.. तबहीं संतोस कहिन यार तुम फिर कहूं खो खा गए तो लभेड हुईहै.. एक काम करौ.. सुनौ सबै लोग.. जौने कोई अगर खोय जाय तो हिंया लेटे भये हनुमान जी केर मंदिर के सामने जाय खड़े हुई जायेव.. तबहीं मनोहर कहिन यार एक बात कही.. तुम लोगे गाली ना दिहेव.. हमरा झोला गायब है.. हम कहा लेव एक अउर खुड़पेंच हुई गे.. फिर हम सबै लोग मनोहर केर झोला ढूंढें मा लगी गे..
 

हम कहा गुरु हुंवा चलौ जहां हम लोगे आग तापत रहेन.. सबै लोग हुंवा पहुंचे तो हुंवा साइड मा मनोहर केर झोला पड़ा भया मिला.. हम कहा मनोहर चेक करि लेव सब सामान है.. तो मनोहर कहिन अरे एमा एक ठो मफलर रहा जो है.. हम कहा अजीब बकलैंड आदमी हौ.. एक ठो मफलर खातिर हम सबै का एतना भगाय दिहेव.. तबहीं संतोस बोले कि चलौ यार गेस्ट हाउस चला जाय.. थकान हुईं गे थोड़ा पौढ़ि लिया जाय.. हम सब गेस्ट हाउस केर कमरा मा पहुंचे तो हुंवा ई संकठा फईल गे कि कमरे मा टीवी तो हैइये नाही..

हम कहा यार तुम कुंभ मेला करे आय हौ कि टीवी देखे आय हौ.. तो कहे लाग कि नाही नाही टीवी बहुतै जरूरी होय.. काहे से हमरा फेवरिट नागिन आय रहा हुईहै.. आज नागिन मा का भा.. यही चिंता मा ससुर नींद ना अईहै .. संकठा यही सब कुड़कुड़ात भये वहीं कोने मा गुड़मुड़ियाय के सोय गए.. हम कहा लेव.. ई कहत रहैं कि नींद ना अइहै अउर सबसे पहिले फईल गे.. दूसरी सुबह हम सबै लोग पहुंची गे कुंभ मेला.. अबकी बार सुना रहै कि फाइव स्टार टेंट लगाय गे हैं..

हम कहा गुरु चलो देखा जाय.. हुंवा पहुंचे तो देखेन का गजब इंतिजाम रहा.. तबहीं एक टेंट से बाबा रामदेव निकले.. उई हमका जानत रहे.. बाबा रामदेव कहे अरे राजू भईया..!! निकसि आव इधिर.. बाबा रामदेव हम सबै लोगन का आपन फाइव स्टार शिविर केर अन्दर लई गे..दोस्तों बाबा रामदेव केर फाइव स्टार शिविर मा का का भा.. ई सब हम आपका बताईब अगली कड़ी मा..लास्ट मा हम एक्के बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..