दीपिका पादुकोण छपाक से जेएनयू पहुंच गई रहीं- राजू श्रीवास्तव

दोस्तों ईरान अउर अमरीका केर अलग लफड़ा चालि रहा.. वइसे ई अमरीका जो चाहत है करि देत है.. पाहिले ओबामा के आर्डर पे अमरीकी फौज पाकिस्तान मा घुसि के ओसामा का मारि दिहिस रहै.. जब ई आपरेसन भवा रहै तो एका करे से पाहिले ओबामा ना आपन मेहरारू का बताईन.. ना केहू और का बताईन.. बस चुपचाप सन्नाटे में ओसामा का पेल दिहिन.. वइसहे ट्रंप भी इरान में सुलेमानी का मारे से पाहिले केहू का नाहि बताईन.. बस ठोंक दिहिन..

अइसहे हम चाहित है कि मोदी जी भी करैं.. जो लोगे भारत के दुसमन हैं.. उनकौ लपेटें.. अरे ना जान से मारौ तो कम से कम उठवाय लेव.. ये विजय माल्या.. नीरव मोदी लोगन का भी केहू का बताय बिगैर कुछ करौ.. जब मिशन कामयाब हुई जाय तो सबका बताय दिहेव कि हां हमहिन किया है.. ई सब लफड़े के दौरान तेहरान मा युक्रेन केर यात्री विमान क्रैश भवा रहै जेमा 176 यात्री मरिगे रहैं.. पहिले तो यू बात चलत रही की जांच होई कि कईस ई हादसा भवा आय..

बाद मा ईरान खुदै मान लिहिस कि ई ट्रंप वाले कांड से बौखलाहट मा हमहीं लोग गलती से युक्रेन केर यात्री विमान मिसाइल से मार गिराय रहन.. अरे भईया अईस गलती कइसे हुई गे.. उई बिचारे 176 लोगे तो आपन जान से गए.. तुम्हरी ई गलती माफ़ करे लायक नाहीं.. एकी पूरी जांच करौ अउर जौने लोगे दोषी आंय.. उनका सजा देव अउर इस घटना मा मरे लोगन के परिवार वालन का उचित मुआवजा देव.. इधिर दिल्ली मा विरोध परदरसन मा दीपिका पादुकोण छपाक से पहुंच गयी रहैं..

उन लोगन के साथे खड़ी तो रहीं मगर कुछौ बोली नांहि.. हम कहा ई कईस हुई सकत है.. काहे से ई औरतें बिना बोले रहै नाहि सकत.. ऊ तो बाद मा हमका पता चला कि दीपिका मुंहे मा गुटखा दबाय रहीं.. कानपुर के बऊवा बाजपेई उनका ‘मसाला’ केर पुड़िया दिहिन रहैं.. नहीं तो दीपिका गयी रहीं तो कुछ बोलतीं कि उई विरोधी लोगन के साथ समर्थन मा खड़ी हैं.. भईया हमरी समझ मा तो ई दीपिका आपन फिलिम ‘छपाक’ के परमोसन के चक्कर मा छपाक से पहुंची रहीं..

वहु बहती गंगा मा हाथ धोय की कोसिस करिन रहैं.. मगर उनके इस एक्शन केर रिएक्शन मा उई सोशल नेटवर्क पे खूब ट्रोल भयीं.. वइसे कुछौ कहौ ई गुटखा है बड़े काम की चीज़.. पहिले हमरी मेहरारू भी विविध भारती की तरह हर टाइम बजा करत रही.. ऊ तो एक दिन नौघड़ा वाले पुत्तू तिवारी हमका रस्ता बताईन कि गुरू जब भौजाई रेडियो जइसन बजे लगें तो उनका गुटखा खवाय दिया करौ.. वै दिन आय अउर आज का दिन आय.. जब हमार मेहरारू केर ‘बाजा’ सुरू होत है..

हम तुरंत भाग के एक पुड़िया लाय के उनके मुंह मा डाल दईत है.. उई मसाल दाब के चुप रहत हैं.. कसम से बड़ी सांती रहत है.. इधिर अमित शाह अउर मोदी जी सब बीजेपी वालन से कहिन हैं कि घर घर जाय के सीएए के बारे मा बताव अउर सबका भ्रम दूर करौ.. सबका समझाव कि भारतवासीयन का कौनो नुकसान नाहि है.. लेकिन विपक्षी भी कमर कसे हैं.. उई कहिन कि हमहूँ लोगे घर घर जाय के बतइबै कि एमा का का बुराई है.. कल हमरे घर अमित शाह के भेजे भये दूत आय अउर हमका समझावे लगे कि का का फायदे हैं..

उई लोगे हमका समझाय के जइसेहे गए.. उधिर से विपक्षी पार्टी के समर्थक आयगे.. उई लोगे ई बतावे लगे कि इससे नुकसान आंय.. तबसे हमार दिमाग नौघड़ा हुई गा.. अईस लागि रहा जानो कोऊ हमरी खोपड़ी मा घंटाघर दई मारिस होय.. तबै से हम अईस कड़कड़ात सरदी मा उघारे खटिया मा चौंधियाय भये बइठे हन.. अउर भईया हम तो सबै से कहित है कि अगर कौनो बात नीक नाहि लगत है तो विरोध करौ.. मगर हिंसा ना करौ..

बसें टेम्पू ना जलाव.. ना मचाव दंगा.. नाहि तो जेल जहियो.. कुर्की होई.. का फायदा.. इसलिए अगर करे का है तो सांतीपूर्ण परदरसन करौ.. नाहि तो घर बइठो.. भयंकर सरदी आय.. घरे बईठ के गुड़ की पट्टी खाव.. इधिर तिहाड़ मा निर्भया बिटिया के साथ हैवानियत करे वाले चारों कुकर्मी दरिंदो की तिरछी चालि रही.. जईस जईस उनकी फाँसी केर दिन नजदीक आय रहा.. मौत केर खौफ से कलेजा मुंह मा आ रहा है..

अभीन परसों तिहाड़ जेल परसासन फांसी देवे खातिर इन चारों लोगन के गले की नाप लिहिस तो उई चारों शैतान रोवे लाग.. इनका अब पता चलत होई कि केहू के साथ अईस जघन्य काण्ड करे का अंजाम का होत है.. वइसे हमका केहू के मरे पे गम होत है मगर ई लोगन के मरे पे हमका बहुत ख़ुशी होई.. इससे भारतीय न्याय व्यवस्था पे सबका विस्वास बढ़ी..लास्ट मा एक्के बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..।