सुनौ पाकिस्तान.. तुमका पूरा कश्मीर भूले का पड़ि- राजू श्रीवास्तव

दोस्तों बहुत सी बातें आंय जो हमका समझ मा नाहि आवत हैं जइसे कोऊ से पूछौ कि कहां गे रहेव.. तो कहत हैं थोड़ा लालबंगला तक गे रहन.. हम कहा थोड़ा काहे गयेव.. पूरा जातेव.. अइसेहे कोऊ से पूछौ कि काहे लेट हुई गयेव.. तो कहियें कि थोड़ा खाना खावत रहेन.. अरे भईया थोड़ा काहे खायेव.. खाओ तो पूरा खाना खाव.. अइसेहे एक अउर लब्भड़ आंय हमरे दर्शनपुरवा के कनौजिया.. हमका दुई महीना बाद मिले तो हम अइसेहे पूछि लिहेन कि इत्ते दिन कहां रहेव बे?.. तो उई शरमाय के जवाब दिहिन..

 

ऊ कन्नौज मा थोड़ा शादी रही हमरी.. हम कहा अबे शादी थोड़ी काहे किहेव.. ई तो पूरी करे के चाहि.. तुम थोड़ी शादी करि के कानपूर आय गयेव.. उधिर कन्नौज मा बाकी की शादी कोऊ अउर निपटाय दिहिस तो?.. अभीन कलै की बात लेव.. हमरे साथै रहैं नील वाली गली के कुंजीलाल.. मुंह मा गुटखा भरे हमसे कहे लाग कि आव गुरु जरा चौराहे तक टहिल के आवा जाय.. हम कहा चलौ.. हम डरित है का किसी से.. हुंवा चौराहे पे अमरूद वाला ठेला लगाय रहा.. ई उससे पूछिन मीठा है..

तो अमरूद वाला इनसे कहिस पहिले मसाला थूकौ फिर कहौ का कहि रहे हौ.. तो कुंजीलाल मसाला थूक के उससे पूछिन अमरूद मीठा है? .. उई कहिस हां हमरा अमरूद तो बहुतै मीठा आय.. तो कुंजीलाल कहिन तो दुई बड़े वाले काट के ओमा नमक लगाय के दई देव .. हम कहा कि जब तुमका अमरूद मा नमक लगाय के खावे का है तो फिर मीठा है काहे पूछेव बे.. ई बात पे अमरूद वाला भी चिरमिराय के खींसे निपोर के कहिस अरे बाबूजी..

अजब चलि रहा आय.. लोगे मीठे मीठे फल मा नमक मिर्ची लगाय के खात हैं.. दोस्तों आजकाल इन्टरनेट पे.. न्यूज चैनल पे एक पलेटफारम सिंगर रानू मंडल केर बहुत चर्चा चालि रही आय.. अचानक आपन गायकी से उई जमीन से आसमान पे पहुंच गयी.. हिमेस रेसमिया उससे गाना गवाईन.. सलमान खान ओका पचपन लाख का फलैट गिफ्ट करि दिहिन अउर आपन अगली फिलिम दबंग-3 मा उनसे गानाऔ गवइहैं..

ओकी अईस जबरदस्त कायापलट से परभावित हुई के आपन हालसी रोड वाले संकठा भी सेंट्रल स्टेशन के पलेटफारम नंबर-7 पे बईठ के गाना गाय लगे.. हिमेस रेसमिया तो नाहि आवा मगर पांच छह आवारा कुत्ते संकठा के साथ सुर मा सुर मिलावे लगे अउर जीआरपी वाले आय के उनके दोनों सुर सुजाय दिहिन.. खैर ई तो रही इधिर उधिर की बात.. अब बात करब मुद्दे केर.. बात ई आय कि ई पाकिस्तानी प्रधानमंत्री इमरान खान अलग पगलाय रहे हैं..

पहिले जब उनकेर बस नाहि चला तो उई भारत पाकिस्तान वाली बस बंद कराय दिहिन.. एखै बादौ बस नाहि चला तो ट्रेनौ बंद करि दिहिन.. ओके बाद पूरे विश्व मा कटोरा लई के समर्थन मांगत रहे.. जब कौनो भीख नाहि दीस तो परमाणु बम दगावे की धमकी दे लगे.. इस पे आपन त्रिदेव.. यानी मोदी जी, अमित शाह अउर योगी जी खूब ठहाका मारि के हंसे अउर मोदी जी बोले कि अच्छा जो हमरे पास परमाणु बम आय.. ऊ का हम दीवाली मा छुड़ावे खातिर रक्खे हैं का..

अरे हम तो हिंया तक सुना आय कि पाकिस्तानी प्रधानमन्त्री आवास पे हुंवा केर बिजली विभाग का पचपन लाख बिल बकाया आय.. सुना है इमरान खान का जावेद मिंयादाद कटिया लगावे का जुगाड़ करे की राय दीन हैं.. कुल मिलाय के ई समझौ कि पकिस्तान की खटिया खड़ी हुई चुकी है अउर ई बात करत हैं कश्मीर लेवे की.. अरे आपन त्रिदेव आजकाल एक्दमै फुल फॉर्म मा भौकाली चलि रहे आंय.. कबहूं हौंक दिए जइहौ.. ई टाइम हिन्दुस्तान का ना छेड़ौ..

काहे से आजकाल हिन्दुस्तान केर मठाधीशी टॉप पे चालि रहि आय.. वइसे दोस्तों राजनाथ सिंह जी भी एक्दमै से चार्ज हुई गे अउर बहुत जोश मा आक्रामक हुई के सामने आय हैं.. राजनाथ जी भी बमक के पाकिस्तान से कहिन कि अब कौनो विषय पे बात ना होई.. बात होई तो सिरिफ POK पे होई.. अउर सुनौ पाकिस्तान तुमका ई पूरा कश्मीर भूले का पड़ि .. काहे से ऊ हमार आय.. खैर राजनाथ जी मा अउर अमित शाह के बीच अईस कम्पटीसन चलि रहा आय तबहूं बढ़िया आय.. काहे से एमा फायदा तो आपन देस अउर देसवासीयन का हुईहै.. लास्ट मा एक्कै बात कहे चाहित है.. कि हमरी बात ध्यान से सुना करौ.. काहे से हमरे घर में हमरी कोई सुनत नहीं है।