ई अजब विपदा है आई.. न नाई.. न बाई.. न कमाई- राजू श्रीवास्तव

झेलौ घर मा बईठ लुगाई अउर बाहर निकलेव तो ठुकाई.. हर तरफ ग्रीन.. ओरेंज अउर रेड जोन केर चर्चा आय.. ई अजब विपदा है आई.. न नाई.. न बाई.. न कमाई.. न घुमाई.. न मिठाई.. न शहनाई.. हालचाल पूछे का अब नया तरीका मारकीट मा आवा है.. अउर भईया.. कौने क्षेत्र से हौ??.. आय वाले टाइम मा केहू की शादी केर बातचीत अईस होई.. भाईसाब.. लरिका का करत है?.. जवाब मिला जी.. एकर ग्रीन जोन मा वाइन शॉप आय.. इससे छोट दुई लरिका अउर हैं..

एक केर किराना केर दूकान आय अउर एक केर मेडिकल शॉप.. पता चला लड़की वाले वहीं बिछ गए कि अरे फिर तो रिश्ता पक्का.. वइसे हमरी दुई लडकियां अउर हैं .. दोस्तों हमाय काकादेव वाले अन्नू अवस्थी घर बइठे बइठे इत्ता बोर हुई गे कि गली मा आय सब्जी के ठेले वाले से कहिन गुरु.. तुम हमरे घरे सोफा मा बईठ के आराम से टीवी देखौ.. हम जरा तुम्हरा ठेला लई के एक चक्कर मारि के आत हन.. तो ठेले वाला बोला अरे दद्दा हमका पहिचानेव नाही.. हम रमेस..

 

अरे हम ई पीछे वाली गली मा तो रहत हन.. सब्जी वाला तो हमरे घरे बईठा रामायण देखि रहा है.. बताव अईस घपड़चौथ चलि रहा है.. का जाने ई लॉकडाउन कब खुलि.. अच्छा हमरे देश मा लॉकडाउन एकदम लुंगी जईस आय.. ऊपर से तो कस के गांठ मारी है.. पर नीचे से सब खुला है..!! अइसहे कल हमार पड़ोसी सुनील प्रजापति पेट पर से बार-बार नीचे सरकत जात बरमूडा का ऊपर चढ़ात भये पत्नी से कहिन हमका लगत है कि ई लॉकडाउन मा हम दुबलाय गे हन.. देखौ ई बरमूडा कित्ता लूज हुई गा..

 

उनकी पत्नी कहिन तुमका डेढ़ महीने से दारू नाही मिली.. सब ओकर नतीजा आय.. सीसे मा ध्यान से देखौ.. हमरा स्कर्ट पहिने घूमि रहे हौ.. अच्छा ई Lockdown मा कुछ लोग सोचिन कि चलो अच्छा आय.. यहै बहाने हमरी सिगरेट केर लत छूट जाई.. सिगरेट तो नाही छूटी उल्टा बीड़ी की भी लत लागि गे.. पिछले दिनों हमाय हरजेन्दर नगर वाले फूफा हमका फोन करि के ज्ञान दिहिन कि परलोक सुधारे का है तो पाप धोत रहौ.. अउर ई लोक सुधारे का है तो हाथ धोत रहौ.. अच्छा कुछ इलाके मा सामान खरीदे की छूट मिली है.. परसों हम सामान खरीदे बाजार गे रहन तो एक अनजान औरत हमरा हाथ पकड़ के बोली अजी सुनते हो.. सब्जी कौन सी लूं?..
 

जब हम आपन चेहरे से मास्क हटावा तो शर्माय के बोली हाय राम!! हमरे ‘ये’ किधर गए..!! इसीलिए कहत हन कि ‘खतरा’ अभीन टला नाही है.. घरे रहौ.. सुरक्षित रहौ.. कल संकठा खुशी के मारे मोहल्ले मा नाचत रहा.. हम कहा का है बे.. इत्ता फईलबट्टा काहे मचाय हौ.. तो संकठा आपन मुर्गी डांस रोक के बताईन हम अभी ग्रीन जोन मा हन.. हमरी मेहरारू मायके मा है अउर ओका मुहल्ला आय गवा रेड जोन.. बस समझ जाव.. अउर राजू भईया अब तो ग्रीन जोन मा ठेके भी खुलि गे..

 

ई कहि के संकठा फिर मुर्गी डांस करे लाग.. तभीने मेहरारू का फोन आवा.. पूछिन का करि रहे हौ?.. संकठा कहिन बस घर की व्यवस्था सम्भाल रहे हन.. मेहरारू बोलीं तो ठीक आय.. अगर ‘देश की अर्थव्यवस्था’ संभाले की कोशिश किहेव तो आय के तुमका इत्ता ‘सेनेटाइज’ करबै कि जिंदगी भर यू ना समझ पइहौ कि ‘क्वारेंटाइन’ ठीक रही या ‘आईसोलेशन’!! वइसे शराब की इत्ती डिमांड देखि के लगत है कहूं पतंजलि वाले बाबाजी शुद्ध सोमरस ना लांच करि दें..

 

ई गजल गायक पंकज उधास का शायद ई लॉकडाऊन का बरसों पहिले से आभास हुई गवा रहै.. उनका पता रहै कि दारू की भारी कमी पड़े वाली आय. उई सबका चेताइन रहैं.. कि थोड़ी थोड़ी पीया करो .. कल हमहूं सोचा जरा इधिर उधिर पता करें का हाल है.. सिविल लाइन वाले संतोस का फोन कर के पूछेन.. तुम्हरी तरफ दारू की दुकान खुलि गे का?.. तो संतोस जवाब दिहिन यस माय डिअर.. एवरी वाइन शॉप ओपन हियर फ्रॉम 10 am टू 5 pm .. हम समझि गे कि संतोस धर भी लीन हैं..

 

वइसे दारू खरीद के जो लोग देश की अर्थव्यवस्था का मजबूती प्रदान करि रहे है.. उनके उप्पर भी सरकार को हेलीकॉप्टर से चखना फेंकवाना चाहिए.. अउर जो लोग शराब की दूकानन पर शराबी लोगन की भीड़ देखि चिंतित हैं उनका ई नाही पता कि असली आंदोलन तो उई दिन देखे का मिलीहै जब ‘ब्यूटीपार्लर’ खुलिहैं.. अब कुछ सीरियस बात हुई जाय.. आप सबै लोगन से हाथ जोड़ के कहित हन.. बेवजह बाहर मत निकलौ.. घर मा सुरक्षित रहौ.. बाह्यजगत का मोह अउर हर बात का हल्के मा लेवे की आदतें त्यागि देव.. काहे से जीवन अनमोल है.. तुम हौ तो सब है ..।