गरमी अउर बेइज्जती जेतना महसूस करिहौ उत्ता जादा लगिहै- राजू श्रीवास्तव

मुझे नींद ना आये मुझे चैन ना आय कोई जाय जरा देख के आये.. ये पंखा कैसे बंद हो गया.. ये पंखा कैसे बंद हो गया.. दोस्तों ई गाना हम कल रात मा तब गावत रहैं जब अचानक हमार कमरे का पंखा बंद हुई गवा रहै.. ऊ तो बाद मा पता चला कि बिजली चलि गयी रही.. आजकाल का गजब गरमी पड़ रही है.. वइसे गरमी अउर बेइज्जती जेतना महसूस करिहौ उत्ता जादा लगत है.. लेकिन भईया ई गरमी का एक फायदा भी आय.. कि गरमी मा ठंडी नाही लगत है..

वइसे गरमी केर मौसम का एक नुकसानौ आय.. ऊ नुक्सान ई है कि आप रात मा रजाई मा घुसि के मोबाइल नाही चलाय सकत हौ.. वइसे आजकाल तो ठन्डे पानीहौ के भाव बड़िगे हैं.. ओका भी पूरा भाव चाहि.. मानि लेव आप फ्रिज से ठंडा पानी निकालेव अउर ओका पिए मा अगर थोड़ी देर लगाए दिहेव तो उई गुस्से मा गरम हुई जात है.. बताओ अईस हपक के चिरैन्धी गरमी पड़ रही कि का बताई.. हमका निराला नगर वाले पुत्तु बताईन कि भरी गरमी मा इलेक्शन इसलिए होत हैं ताकि गरमी मा लम्बी लाइन लगे के बाद धूप मा जलिके आपकी शकल वोटर कार्ड से मैच करि जाय.. वाह..!!

अइसेहे अबकी कानपूर मा वोटिंग वाले दिन कल्यानपुर मा एक लड़की पहिली बार वोटिंग करे बूथ पे गयी तो हुंवा वोटिंग अधिकारी से कहिस हमरी उंगली पे पिंक कलर का निसान लगायेव.. हमरी स्कर्ट टॉप से मैच करत भय.... चुनाव अधिकारी तो खड़बड़ाय गवा.. उई कहिस मैडम हिंया एक्के कलर होत है.. काला.. तो उई लड़की इठलाय के बोली तुम्हरे पास पिंक निसान नाही है तो साफ बताओ.. वरना हिंया बहुत से दूसर बूथ भी आंय.. हम कहूं दूसर बूथ से लगवाय लेबे .. वइसे हम देखा आय कि जौने लोगे एक किलो खरबूजा खरीदते भये पूरा ठेला सूंघत हैं.. उई टाइप के लोग नेता चुने के टाइम अंधे हुई जात हैं..

वइसे कुछ लोगन का दूसर का हराय मा बहुत मजा आवत है चाहे खुद उनका बैंड बजि जाय.. अइसेहे घाटमपुर के चिरौंजीलाल हैं.. कौनो चुनाव होंय.. उई परचा जरूर भरत हैं.. कौनो पार्टी उनका टिकट तो देत नाही.. चिरौंजीलाल जीत नाही पावत मगर जो जीते वाला होत है.. ओके वोट काट के ओका हरवाय देत हैं.. यही बात मा खुश हुई जात हैं कि उनकी वजह से उई हारि गवा.. वइसे ई चिरौंजीलाल जब चुनाव नाही लड़त हैं तो ट्रेन केर टिकट बल्क मा फर्जी नाम से बुक करत हैं..

बाद मा दूसर के हाथ बेच देवत हैं.. इनका यही बात से खुशी मिलत है कि जेका रिजर्वेशन मिले वाला रहै ओका नाही मिला.. जेका हम दिया ओका मिला.. वइसे भईया कौनो माने या ना माने 2019 मा आएगा तो राहुल गांधी ही.. ई बात हम नाही कहि रहे हन.. ई बात हमका रेलबजार वाले गजोधर बताईन.. उई अभीने बैंकाक से घूमि के लौटे आंय.. गजोधर हमका बताईन कि बैंकाक की हर गली नुक्कड़ सड़क पे पोस्टर बैनर पे लिखा आय कि 2019 मा अहिये तो राहुल गांधी ..

अउर उई पोस्टर बैनर के नीचे लिखा आय थाईलैंड पर्यटन विभाग बैंकाक .. अब ई बात मा कित्ती सच्चाई आय हमका नाही पता.. खैर गजोधर बैंकाक से घूमि के लौटे तो तुरंतै चुनाव परचार मा जुटी गे.. हफ्ता भर पहिले हमसे कहे लाग कि गुरु बनारस मा रैली करे का है .. हम कहा उई तो मोदी जी का क्षेत्र आय.. गजोधर कहिन यार चुनाव से एक चक्कर मार लिया जाय.. काहे से मोदी वइसेहे जीत रहे हैं.. हमाई रैली करे से मोदी जी कि नजर में हमरौ योगदान गिनती मा आ जइहै ..
 

तो हम गजोधर से कहा कि यार तुम नेता एता तो हौ नाही.. तो हुंवा रैली करे खातिर काहे उधियाए हौ.. तो गजोधर कहिन भईया अभीन हम नेता नाही हन पर आगे चल के तो बने का है.. हम 2019 के चक्कर मा नाही हन.. हम तो 2024 मा आपन जुगाड़ लगाय के लिए जइबै .. हम कहा सही आय.. गुरु झाडे़ रहौ कलक्टरगंज.. लास्ट मा हम एक्कै बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..