इत्ती गरमी मा सेल्फी नाही कुल्फी ले का मन करत है- राजू श्रीवास्तव

भईया गरमी आय गयी है.. अईस गरमी मा रिक्शावाले भरी दुपहरिया मा जब रिक्शा खींचत हैं तो बड़ा दु:ख लागत है.. हम तो सवारियन से कहे चाहित है कि इन्सान का बच्चा बनौ.. अरे पुल उल पे चढ़ाई पे उतर के धक्का लगाय देव.. ना धक्का लगाव तो कम से कम उतरि जाव.. वइसे गरमी के मौसम का अलगै मजा आय.. इधिर देखौ तो कच्चे आम केर पना बिक रहा तो उधिर गन्ने का रस.. बस ई ध्यान दिहेव कि ई सब मा गड़इया का पानी ना मिला होय.. वइसे कल गरमी तो इत्ती जबरदस्त रही कि सेल्फी नाही कुल्फी ले का मन करत रहा.. अईस गरमी मा दिन भर लू चलत है.. सब घरन के दरवाजा दिन भर बंद रहत हैं.. गली अउर सड़क सांय सांय करत हैं.. फिर शाम का होत है पानी का छिड़काव..।

आंगन मा छतन पे रोड पे जब पानी छिड़का जात है तो अईस सोंधी सोंधी खुसबू आवत है कि का बताई.. हमरे बचपन मा शाम का पानी छिड़के के बाद अम्मा कहत रहीं कि जाव दही लै आव आधा किलो.. फिर लस्सी बनाय खातिर ऊ दही मथा जात रहा.. हमरे बच्चू भईया तो खूब चुसक चुसक के पियत रहैं जेमा आखीर तलक ओका मजा मिले.. अउर हमरा ध्यान तो ई बात पे लगा रहत रहा कि सबसे बड़ा वाला गिलास कौन सा आय.. हमरे किदवई नगर मा एक हलवाई लस्सी बनात रहा.. बड़े से कुल्हड़ मा लस्सी देत रहा..

ओके उप्पर मोटी मोटी मलाई अउर रबड़ी डालत रहा.. कसम से आत्मा तृप्त हुई जात रही.. हम जब भी कानपूर आईत है तो ओका ढूंढीत है.. पर हमका कोऊ बताईस कि ऊ जेल मा है.. उई पानी के बताशा वाला पानी मा नाले केर पानी मिलावत रहा.. जब उनसे दरोगा पूछिस कि अईस काहे करत हौ तो कहिन नाले वाला पानी पहिलेहे से मसालेदार रहत है..। वइसे दोस्तों इत्ता मजा आवत रहा बचपन मा कि उई टाइम कभू कभू मन करत रहा कि गुरु ई गरमी का मौसम सालों साल रहे तो अच्छा है.. अच्छा अब बात करत हन आईपीएल की.. वइसे माने वाली बात आय चाहे मानो या ना मानो..

आजौ धोनी के दम है.. आपन टीम का फिर से फाइनल मा लई आय.. आज धोनी के पास इत्ती सारी बाइक हैं बीएमडब्ल्यू अउर मर्सडीज हैं पर ई नेक आदमी एक-एक रन खातिर पैदल दौड़त है.. वइसे अबकी आईपीएल मा विराट कोहली नाही चले.. उनकी टीम नीचे से पहिले नंबर पे रही.. अब ई आईपीएल का रिजल्ट तो आय गवा पर अभीन दूसर आईपीएल का रिजल्ट आवे वाला है इंडियन पॉलिटिक्स लीग.. अबकी सपा के चुनाव परचार मा सोनाक्षी अउर डिम्पल मंच पे साथ खड़ी रहीं..

दुइनो एक दूसर से कम नाही लगत रही.. दुइनो हेरोइन लगत रहीं.. वइसे प्रियंका भी सुन्दर आंय.. उनके हाव भाव से लगत नाही है कि उई इत्ती बड़ी नेता आंय.. वइसे डिम्पल अउर प्रियंका की बातचीत से लगत है कि ई लोग आपन मर्जी से राजनीति मा नाही आई हैं.. दुइनो साधारण गृहणी लगत हैं..  जइसे हमाय तुम्हाय घरन मा बहिन भौजाई होत हैं वइसेहे ई दुइनो भी हैं.. तो भईया जेकी इच्छा होय ओका चुनाव लड़ाव.. अभीन पिछले दिनों योगी जी अउर आजम खान के उप्पर तीन तीन दिन खातिर बैन लगा रहा..

मेनका गांधी अउर मायावतीऔ का भी दुई दुई दिन खातिर बैन किया गवा रहै.. हमका ई समझ मा नाही आवत है कि हमेशा नेता लोग काहे बैन होत हैं.. उई मतदाता भी बैन होंय के चाहि जो वोटिंग वाले दिन वोट दे नाही जात हैं.. घर मा बइठे रहत हैं.. इन लोगन का भी 72 घंटे का बैन होना चाहि.. इनका इंटरनेट बंद होय के चाहि.. सोशल नेटवर्क बंद.. ई लोगे जब फेसबुक पे लॉगइन करैं तो फेसबुक इनसे कहे कि पहिले जाय के वोट डाल के आव तब घुसे देबे .. चुनाव आयोग का चाहि कि अईस लोगन के लैट्रीन मा ताला डाल देवे कि जाव 72 घंटे बंद.. इनका मसाला गुटखा बंद होय के चाहि.. ई जब पुड़िया खरीदे जांय तो दुकानदार कहे कि पहिले उंगली दिखाओ.. वोट किहेव? ..लास्ट मा हम एक्कै बात कहे चाहित है कि हमरी बात ध्यान से सुना करौ.. काहे से हमरे घर में हमरी कोई सुनत नहीं है ..