अभिनंदन की वतन वापसी पर बोले राजू श्रीवास्तव अबकी पाकिस्तान से बहुतै जबरदस्त ‘बातचीत’ भई है

दोस्तों विंग कमांडर अभिनंदन केर सुरक्षित भारत वापसी से पूरे देस मा हर्ष उल्लास केर माहोल रहा.. पहिले सब कहत रहैं कि ई मोदी विदेस बहुत घूमत हैं.. दोस्तों प्रधानमंत्री केर विदेस नीति अउर सब देसन से उनकी दोस्तीये से ई संभव भवा कि पाकिस्तान एकदम अकेला पड़ गवा अउर उसपे पूरे विश्व केर दबाव बनि गवा जेके चलते ओका विंग कमांडर अभिनंदन का बिना शर्त रिहा करे का पड़ा.. वइसे ई लब्भड़ पाकिस्तान केतना शरीफ है ई पूरी दुनिया जानत है।
 

ई पाकिस्तान आपन देस हिंदुस्तान पे बार बार अटैक करत है.. कभों LOC फांद जात है तो कभों बिना मतलब फायरिंग किया करत है.. ई पाकिस्तान आपन मुल्क मा आतंकवादियन का पनाह दिए है.. अउर तो अउर ई ‘जैश ए मुहम्मद’ जइसे तमाम आतंकवादी संगठनन का पालत पोसत है अउर उनका ट्रेनिंग देत है.. उप्पर से ये पाकिस्तान कहत है कि हम युद्ध नाही करे का चाहत हैं.. भारत का बातचीत से कौनो हल निकाले का चाहि।

 

अउर तो अउर अपने हिंया महबूबा मुफ्ती, फारूक अब्दुल्ला अउर नवजोत सिंह सिद्धुओ पाकिस्तान केर सुर मा सुर मिलाय के कहत हैं कि खून खराबे से कौनो फायदा ना हुईहै.. दोस्तों भले ही पाकिस्तान हमार सैनिकों का मारे मगर ई लोग शांति केर ढपली लिए ‘बातचीत’ करे का राग अलापा करत हैं.. तो इनकी ‘बातचीत’ से इंप्रेस हुई के अबकी आपन इंडियन एयरफोर्स ने कहा कि ठीक है.. अबकी हम लोग ‘बातचीत’ करब। 

 

ई बार पाकिस्तान से हम ‘बातचीत’ करब.. अउर दोस्तों आपन इंडियन एयर फोर्स 26 फरवरी केर सुबह 3:30 बजे आपन बारह से पंद्रह लड़ाकू विमान लैके पाकिस्तान मा घुसि के जौने तरीके से आतंकवादियन से ‘बातचीत’ करिन है ओका कौनो जवाब नाही.. ई बार इंडियन एयरफोर्स 300 से जादा आतंकवादियन से अईस जबरदस्त ‘बातचीत’ करीन है कि उई आतंकवादी अब कौनो अउर ‘बातचीत’ करे के लायक नाही बचे। 


 

इस पर जब महबूबा मुफ्ती से पूछा गवा कि ई ‘बातचीत’ के बारे मा अब का कहत हौ ?.. तो उई बोलीं अब ई ‘बातचीत’ पर हम का ‘बातचीत’ करैं.. सारी ‘बातचीत’ तो इंडियन एयरफोर्स करि लिहिस.. पकिस्तान से तो बहुतै जबरदस्त ‘बातचीत’ भई है.. तबहीं हमाय बकरमंडी वाले छुट्टन भाई उनसे बोले ई वीर हैं भारत माता केर.. ई कायरन से का हरिहैं.. तुम इनका चुनौती मत दिहेव.. ई घर मा घुस के मरिहैं। 

 

दुई दिना बाद पटकापुर वाले गुप्ताजी मिले तो कहे लाग कि राजू भईया.. 26 फरवरी केर सुबह सुबह हमार मेहरारू हमका झिंझोड़ के उठाईस.. हम कहा का भा?.. तो कहे लागीं कि टीवी देखौ टीवी.. कहे लागीं कि आज सुबह सुबह मोदी जी हरेक भारतीय का पंद्रह-पंद्रह लाख दई दीन्हेन.. भैया जब हमहूं टीवी देखेन तो गंगा कसम मन प्रफुल्लित हुई गवा.. हम कहा वाह मोदी जी वाह.. कसम से हम लोगन का पंद्रह-पंद्रह लाख मिलि गए। 

 

हम कहा गुप्ताजी बात तो सही कहि रहे हौ.. लेकिन दोस्तों आपन देस मा अइसे लोगन केर भी कमी नाही जो अईस हालत मा भी जबरदस्ती आपन प्रधानमंत्री का विरोध करि रहे हैं.. उई कहि रहे हैं कि नाही नाही.. अईस नाय भवा.. हम पता लगावा है अउर हमका जानकारी मिलि है कि जौने मोदी जी कहि रहे हैं कि हजार-हजार किलो केर बम पकिस्तान मा दागे गए हैं.. उई हजार किलो केर नाही रहैं.. उई बम 999 किलो केर रहैं.. ई मोदी जी झूट फैलाय के जनता का गुमराह करि रहे हैं ..

 

वइसे दोस्तों 14 फरवरी का जब आतंकवादियन ने जब हमार सीआरपीएफ केर जवानन का धोखे से मारा रहा तो यही टाइप केर नेता लोगे कहत रहे कि छप्पन इंच केर सीना नाही होय मोदी जी का.. अट्ठाइस इंच केर होय.. लेकिन जब मोदी जी सर्जिकल स्ट्राइक-2 करि दिहिन तो कहे लाग कि नाही नाही मोदी जी केर सीना छप्पनै इंच केर होय.. अरे हम तो कहित है कि आपन मोदी जी केर सीना छप्पन नाही एक सौ छप्पन इंच केर होय..
दोस्तों आनंदित हुई गवा मन.. मिटि गे सारी झेंप.. अरे इमरान मिंया मुबारक हो.. इंडियन एयरफोर्स केर पहिली खेप.. लास्ट मा एक्कै बात कहे चाहित है.. कि हमरी बात ध्यान से सुना करौ..
काहे से हमरे घर में हमरी कोई सुनत नहीं है...