राहुल गांधी खुद कभों घोड़ी नाही चढ़े तो हाथी पे का चढ़िहैं: राजू श्रीवास्तव

दोस्तों हम पिछली दफा बताये रहे की कुम्भ मा हमका बाबा रामदेव मिलिगे रहे तो उई हमका आपन शिविर मा लई गे.. बढ़िया इंतिजाम रहा.. लगत रहा कौनो फाइव स्टार होटल केर कमरा होय.. बाबा रामदेव हमसे कहिन कि कहाँ ठहरे हौ..

हम कहा गेस्ट हाउस मा.. तो उई कहिन जाओ आपन सब सामान लइ के हिंया आय जाओ.. हम संकठा, मनोहर, संतोस अउर पुत्तन से कहा गुरु लपक के आपन सामान हिंया लई आव.. हिंया टीवीऔ है.. तोहरा नागिन सीरियल ना छूटि.. सबै भागे गेस्ट हाउस से आपन सामान लावे खातिर.. तो बाबा रामदेव हमसे कहिन का लेहौ?.. चाय कॉफी या ग्रीन टी.. हम कहा ग्रीन टी, फिर बाबा रामदेव कहे लाग.. राजू भईया ग्रीन टी केर तीन फायदे होंय..

एक तो दूध बचत है.. बिस्कुट बचत है अउर तीसर एका सबसे बड़ा फायदा ई होय कि जेका पियाव.. उई दुबारा मांगत नाहि है.. दुबारा तुम्हरे घरौ नाही आत है.. एके बाद हम सब दोस्तन संग संगम किनारे पहुंची गे.. तबहीं एक खपटहा सा आदमी कहिस हटो हटो योगी जी आय रहे हैं.. हम कहा काहे हटें.. उई आय रहे हैं तो आवें.. हम कहा मना करित है.. हम देखा योगी जी के साथै सिधार्थनाथ सिंह, सतीश महाना, केशवप्रसाद मौर्य अउर पूरा मंत्रिमंडल आवा रहा..

उघारे नंगे बदन कोऊ नेता पहिचान मा नाही आवत रहा.. सबै पंचे उन लोगन का नंगा देखि के हंसत रहै.. कोऊ का पेट मटका जईस तो कोऊ हलवाई लगत रहा.. थोड़ी दिर बाद उई खपटहा आदमी फिर चिल्लावा हटो हटो स्मृति इरानी आय रही हैं.. तबहीं अचानक करीब सौ दुई सौ हरि लाल टोपी पहिने झोला लटकाय लोग आय गए.. ई खपटहा फिर चिल्लाय लगा हटो हटो अखिलेश यादव आय गे.. हम कहा यार हमरा मूड बनि रहा है कि तुमका झपड़ियाय दें..

बस तुम्हरी सिंगल चेसिस खातिर हाथ नाही उठि रहा.. खाली पीली चिल्लाय के माहोल खौफनाक बनाय देत हैं.. फौजफाटे के निकले केर चक्कर मा एक नागा बाबा का धक्का लग गवा.. उई क्त्रसेधित होय के त्रिशूल मारे वाले रहे कि हम उनके सामने हाथ जोड़ दिए।  तबहीं उई सुखडा खपटहा फिर चिल्लावे लाग कि हटो हटो राहुल गांधी अउर प्रियंका आय रहे हैं.. हम ओका पकड़ा अउर कोने मा लइ जाय के पूछा कि तुम को आईव जो तुमका सब खबर मिल जात है कि को आय रहा को जाय रहा..

अगर तुम्हरे चिल्लाय से कुम्भ मा भगदड़ मचि गे तो जित्ते कनपुरिया आयं तुमका मार मार के भठूरा बनाय देहें..  . तो वहीन एक बूढ़ी अम्मा रहीं.. उई प्रियंका से कहिन बिटिया बहुत देर मा आईव?.. तो प्रियंका कहिन हाँ कुम्भ आय मा देर हुई गे.. तो उई अम्मा कहिन कुम्भ नाही.. राहुल गांधी का साथ दे मा बहुत देर बाद आईव तुम..  उई हँसि के बोलीं कि हम प्रियंका नाहीं मायावती हन..  तबहीं कोऊ बाबा बोला ई राहुल मायावती से गठबंधन काहे नाही किहिन?..

तो कोऊ पीछे से बोला ई राहुल खुद कभों घोड़ी नाही चढ़े तो हाथी पे का चढ़िहैं. हम कहा यार अबकी कुम्भ मा बाबा लोगन का राजनीतिक जागरूकता बड़ी जबरदस्त है.. 2019 मा मोदी का रोआके के खातिर सब विरोधी अइसे दरवज्जा छेंके हैं जइसे सुहागरात वाले दिन सब भाभी लोग दूल्हा केर रास्ता रोकत हैं जबकि भाभी लोगन का भी पता होत है कि ई दूल्हा अन्दर जाई जरूर..

खाली पीली नौटंकी होत है.. ई साल चुनाव नाही होय रहे हैं.. ई साल योजना चलि रही है.. मोदी रोआको योजना..लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..