आवाजाही से परेशान हुईके प्रयाग वाले रिश्तेदार करिगे पलायन: राजू श्रीवास्तव

दोस्तों पिछली दफा हम आपका बताय रहेन कि कइसे हम आपन चार दोस्तन के साथ बैटरी वाले ई-रिक्सा से प्रयागराज कुंभ नहाय निकसे रहन.. तो भईया मलवां केर पेड़ा खाय के बाद हम लोगन केर सवारी फिर आगे बढ़ चली.. फतेहपुर होत भये प्रयागराज पहुंचे वाले रहें.. पुलिस वाले हम लोगन का दस किलोमीटर पहिलेहै रोक लिहिन कि आगे एंट्री बंद है.. अब पैदल जाओ.. वहीं साइड केर मैदान मा पार्किंग केर इंतिजाम रहा तो मनोहर आपन ई-रिक्सा वहीं खड़ा किहिन अउर हम पंचै पैदलेन चलि पड़े..

हम कहा चलौ यहीं कटरा बाजार मा हमरे रिश्तेदार रहत हैं.. वहीं रुका जाई.. गेस्ट हाउस केर पइसा बचि.. खैर जब हम लोग हुंवा पहुहंचै तो उनके दरवज्जे पे बड़ा सा ताला लटकत भया मिला.. अउर दरवज्जे पे एक ठो कागज चिपका रहा जिस पे लिखा रहा कृपया कुंभ मेला केर दौरान संपर्क करे का कष्ट ना करैं.. संकठा कहिन अब का करिहौ.. वहीं बगल वाले मकान केर दरवज्जे पे एक ठो महिला खड़ी रहीं.. हम उनसे पूछा बहिनी ई लोगे कहां गे.. तो उई बोली भईया परेसान होय के पूरा परिवार बनारस पलायन करि गा.. जेका देखौ इनके हियां कुंभ नहाय चला आय रहा है.. सबका स्टेसन लेवे जाओ.. छोड़े जाओ.. खावे पिए का, रहै का इंतिजाम करौ..

कहिन अब कुंभ मेला केर बादै वापस अइबै.. हम कहा यार बड़ा होसियार गजब आदमी है भईया.. खैर हम लोग बम भोले का जयकारा लगाय संगम की तरफ बढ़ि चले.. मेला पहुंचे तो शाम हुई चुकी रहै.. मगर पूरा मेला मा अईस लाइटिंग रही जानौ दिन होय.. हम सबै थके रहन तो वहीं साइड मा अलाव जलाय कुछ लोग बइठे रहैं तो हम लोगे भी बईठ गेन.. सब पंचे आपन आपन किस्सा कहानी बतावत रहैं.. तबहीं संतोस केसरवानी पूछिन कि नागा लोग बनत कइसे हैं.. तो वहीं आग ताप रहे एक सज्जन बोले अरे कोऊ कोऊ निसंतान दंपत्ति नागा लोगन से आशीर्वाद लैके मन्नत मान लेवत हैं..

वचन दई के जात हैं कि बाबाजी हमरे संतान होई तो पहिला बच्चा आपके अखाड़ा का सौंप देबे.. वही लोग दई जात हैं तो उई बाल नागा बनत हैं.. फिर इनकी ट्रेनिंग सुरू होत है .. तबहीं एक अउर सज्जन बोलि पड़े नागा बनब आसान ना आय.. कि हलवा की तरा खाय लेव.. बहुत बड़ी तपस्या आय.. अउर मिलिट्री वालन से भी भयंकर ट्रेनिंग होत है.. एमा सबसे पहिला पाठ ई सिखावा जात है कि त्याग करौ.. मानव जात केर रक्षा करौ.. इन लोगन का आपन खाना खुद बनाय का पड़त है अउर इनका ई सिखावा जात है कि पहिले सबका खवाओ फिर खुद खाओ..

चाहे सरदी होय.. गरमी होय या बरसात.. इन लोगन का नंगे बदन खाली भभूत मल के रहे का पड़त है.. इन लोगन का दहकती भई आग पे चलावा जात है.. तलवारबाजी.. त्रिसूल-बल्लम कइसे चलावें.. शाष्त्र अउर शष्त्र दुइनो का ज्ञान दिया जात है.. अउर जौने दिन ई नागा बनत हैं.. ई सबसे पहिले आपन परिवार का पिंडदान करत हैं फिर आपन श्राद्ध अउर पिंडदान करत हैं.. कि आज से सब हमरे लिए अउर हम सबके खातिर मरिगेन .. यही सब बात करत भये भूख लाग गै.. एक तो ई संकठा का भूख बहुत जल्दी लग जात है.. दिनभर चरा करत हैं तबहूं भुखान रहत हैं..

कहिन ई सब बातें तो होवत रहिहैं.. पहिले हमका खाना खवाव.. तो हम कहा पईसा दे के खइहौ कि फ्री मा!! तो पुत्तन कहे फ्री मा कइसे खवइहौ !! तो हम कहा उई देखौ सामने अक्खाड़ा मा आरती हुई रही है.. आरती के बाद प्रसाद मा चने केर दाल, रोटी अउर राजमा चावल बंटिहै.. तबहीं मनोहर कहे लाग कि खाना तो हम आपन घरे मा रोजेन खाईत है.. कुछु महिला नागा के बारे मा बताओ .. तो हम कहा

हमका मूलगंज वाले बसेसर मिसरा बताईन रहें कि जौने महिला नागा होत हैं.. उनका माता जी कहा जात है.. ऊई सब माथे पे तिलक लगउती हैं.. अउर गेरुआ कपडा पहिनत हैं.. तबहीं सामने अक्खाड़ा केर आरती खत्म भई.. प्रसाद बंटे लाग.. तो हमहूं सब पंचे लाइन मा लगि गे.. प्रसाद मा चने केर दाल अउर तंदूरी रोटी खावाई गे.. गुरु सबै खूब हौंक के खाईन.. फिर वहीं संगम किनारे रेत पे चटाई बिछाय के हम सबै पौड़िगेन.. ठंडी बहुत रहै पर हमहूं लोग पूरे इन्तेजाम से रहें.. तबहीं एकदम से शोर मचि गा.. चाय बंट रही..

चाय बंट रही .. हम कहा गुरु चाय पकड़ लेव.. सरदी बहुत है.. हुंवा चाय बांटे वाले काउंटर पे घमासान मचा रहा.. खैर जइसे तइसे हम लोग चाय लई के आये तो पता चला पुत्तन गायब हैं.. पुत्तन हेराय गे ..दोस्तों इसके आगे केर कहानी अगले सोमवार का बतइबै.. कि हेराय भये पुत्तन मिले कि नाही..लास्ट मा हम एक्कै बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है !!