चुनाव पर चुहलबाजी: सबन केर नाश्ता हौंकिन, बैनर की बनवइयहैं चड्ढी- राजू श्रीवास्तव

दोस्तों अभीन पिछले सोमवार का आपन शहर कानपूर मा वोटिंग रही.. सबै कनपुरिये एकदम चकाचक बम्पिलाट वोटिंग किहिन रहैं.. आज लखनऊ मा वोटिंग है.. पिछले दिनों हुंवा अलग बवाल चलत रहा.. का भवा कि हुंवा शत्रुघ्न सिन्हा केर मेहरारू पूनम सपा से इलेक्शन लड़ि रही हैं.. अब शत्रुघ्न सिन्हा पहिले रहैं बीजेपी मा.. अब हैं कांग्रेस मा अउर उई लखनऊ मा प्रचार करत रहैं सपा का.. माने आपन पत्नी का.. हुई गवा ना कन्फ्यूजन !!..

शत्रुघ्न सिन्हा कांग्रेसी होत भये समाजवादी पार्टी का परचार करीन तो लखनऊ के कांग्रेसी उम्मीदवार प्रमोद कृष्णन कहिन हम बदला लेबे.. अब हमहूं कांग्रेस मा होत भये सपा का प्रचार करब.. ई बात पे सोनाक्षी सिन्हा रिसियाय के कहिन कि अच्छा अब हम बसपा का प्रचार करब.. अरे ई लोगे परिवार के अंदरै महागठबंधन बनाय दिहिन हैं.. खैर हमसे का.. हम कोऊ के फटे मा टांग नाही अड़ाईत है.. वइसे अबकी गोरखपुर से दुई यादव आमने सामने ठाड़ हैं.. निरहुवा यादव अउर अखिलेश यादव..

निरहुवा तो खैर बड़े टाइप के कलाकार आंय.. मगर उनके सामने अखिलेशौ बड़ी हस्ती आंय.. अरे उत्तर प्रदेश केर पूर्व मुख्यमंत्री आंय कौनो मामूली बात आय का.. अब को जीतिहै को हरिहै हमका इस से का.. उई जाने उनका काम जानै.. वइसे मुगल टाइम केर अनारकली के बाद मायावती दूसर अईस महिला आंय जिनके पीछे बाप बेटे मा झगड़ा भवा हय.. अखिलेश नेताजी से पूछिन नाही अउर भावनाओं मा बही के मायावती से गठबंधन करि लिहिन.. ठीक है कौनो गलत बात ना आय.. पर एक बार बाप से तो पूछे का चाहि..।

अच्छा वोटिंग से पहिले इधिर आपन कानपूरौ मा सभी राजनैतिक पार्टीयन की हपक के रैली रपाड़ा रोड शो चलत रहा.. अइसेहे एक दिन आपन डिप्टी पड़ाव वाले छुट्टन फईल गए.. उई रैली वालन का डंडा लई के दौड़ाय लिहिन.. हम कहा का हुवा में? तुम इन लोगन का डंडा लई के काहे दौड़ायेव बे?.. तो छुट्टन कहिन राजू भईया ई लोगे रैली के बहाने सबके घरन मा तांकझांक करत हैं .. हम कहा उई कईसे?.. तो छुट्टन बताईन यार एक दिन हमरे मोहल्ले केर बजरंगी हमसे कहे लाग.. कि छुट्टन भईया आज तुम भाभी से बढ़िया फुल बॉडी मालिश करवाय हौ.. तो हम कहा हां.. पर तुमका कइसे पता चला.. तो बजरंगी हमका बताईस कि उई रैली मा ट्रक के उप्पर बइठा रहा..

हुंवा ऊंचे से हमरे घर के अन्दर का सब कुछ दिखत रहा.. राजू भईया हमरा तो दिमाग घूम गवा.. बाद मा हम ध्यान दिहेन तो देखेन कि रैली के बहाने ताकझांक करै खातिर ई लोगे ससुर एक घंटा मा चार बार हमरी गली से निकलत रहै.. अरे भईया चुनाव परचार करे का है तो पैदल करौ.. ट्रक टेम्पो के उप्पर चड़ी के सबके घरन के अन्दर तांकझांक काहे करि रहे हौ.. अब का मालूम कउन कइसे बइठा होय लेटा होय.. हम कहा हां यार छुट्टन बात तो तुम्हरी सही आय..

वइसे दोस्तों चुनाव के टाइम खाली फालतू बइठे लोगन की मौज हुई जात है.. ई लोगे झोला मा हर पार्टी केर गमछा, टोपी अउर बिल्ला रक्खत हैं.. बस दुई चार जिंदाबाद जिंदाबाद के नारे लगाईंन अउर काम पैंतीस.. पता चला सामने कांग्रेस का दफ्तर आय रहा है तो खट्ट से कांग्रेस का टोपी बिल्ला गमछा निकार के कांग्रेसी बनि के चाय नाश्ता हौंक दिहिन.. दुपहर मा कमल का बिल्ला टोपी लगाय के बीजेपी केर शिविर मा छोले चावल हौकिन..

शाम का बिरयानी हौंकिन सपा केर ऑफिस मा.. अउर डिनर मायावती केर शिविर मा.. ई लोगे पूरे चुनाव मा मस्त खात पियत हैं अउर वोटिंग के बाद झंडा बैनर लाय के ओकी चड्डी बनियान अउर पर्दा बनावत हैं ऊ अलग से.. खैर चुनाव केर फायदे तो बहुत आंय..वइसे चुनाव के दौरान दारूबाजी भी खूब होत हैं.. कुछ कैंडिडेट वोट खातिर गरीब मतदाता लोगन का रिझावे के चक्कर मा उनका दारु केर पव्वा पाउच बांटत हैं.. उनका रिश्वत देत हैं.. अइसेहे कानपूर मा वोटिंग रही तो जरीब चौकी के पास एक बूथ मा एक शराबी लाइन लगाय रहा..

जब वोट डाले का ओका नंबर आवा तो उई मशीन के सामने खड़ा सर खुजावत रहा.. ओका अईस करत देख हुंवा बईठ चुनाव अधिकारी डांटिस कि जल्दी वोट करौ.. तो उई शराबी कहिस अरे साहब वोटिंग तो बहुतै जरूरी आय.. अउर हम आंय नमक हलाल.. जेका नमक खाए हन ओके साथ नमकहरामी नाहि कर सकत हन.. पर हमरी मुश्किल ई आय कि हमका यादै नाही आय रहा है कि कल रात का कौने कंडीडेट हमका दारु पिलाईस रहै..लास्ट मा हम एक्कै बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..।