चुनाव पर चुहलबाजी: चुनावी अंधड़ चलि रही.. ज्ञान न बांटौ..लस्सी बांटौ- राजू श्रीवास्तव

भईया गर्मी आय गयी है.. अइसे मा आप सभी लोगन से अनुरोध है कि कृपया ज्ञान ना बांटौ.. कुछु बांटेहे का है तो लस्सी बांटौ.. आम केर पना बांटौ.. वइसे भी आजकाल चुनावी अंधड़ अउर लू चलि रही है.. आजकाल अगर रात मा सफेद कपड़ा पहिने कोऊ आय के आपके पैर पकड़ि लेवे तो भूत समझि के डरेव नाही.. उई सांसद पद केर उम्मीदवारौ होय सकत हैं..

आजकाल सबै पार्टी केर नेता भयंकर जनसंपर्क बनाय मा लगे हैं.. बड़ी बड़ी गाड़ी मा बइठे नेता होरे सायरन अउर हूटर बजावत भये नक्शेबाजी पेल रहे हैं.. अरे भईया हूटर ऊटर देखिभाल के बजाव.. कम से कम अस्पतालन के आसपास तो ना बजाव.. सूखी रंगबाजी ना करौ.. इन्सान का बच्चा बनो..!!

अइसेहे एक ठो पइसावाले उम्मीदवार निर्दलीय चुनाव लड़ि रहे हैं.. उनका चुनावी जुलूस बादशाही नाका से कलक्टरगंज से होत भया बिरहाना रोड से निकलि के घसियारी मंडी जात रहा.. तो हमहूं देखत रहे.. उनके साथ आगे पीछे छुटभैये नेता टाइप चापलूस भी रहे.. उई लोगे ई नए बने नेता का ज्ञान देवत रहे.. भैया ई मंदिर केर घंटा बजा देव.. बहुत बढ़िया सन्देश जहिये.. हिंया ई कुल्हड़ मा चाय पी लेव.. ई कीचड़ मा बजबजावत गली से निकसी जाओ.. ई मोहल्ले के सबसे बुजुर्ग आदमी आंय..

पांच हजार वोट इनके जेब मा आंय.. लटक जाओ पैर पकड़ के.. ई बच्चे का गोद मा उठाय लेव.. नंगा फुंगा गन्दा है तो का भवा.. जल्दी उठाव नाही तो मीडिया निकसि जाई..। पता चला ई नए नए उम्मीदवार का ई छुटभैये टाइप नेता लोग आपन डमरू बजाय के उल्टा सीधा नचाय रहे हैं.. अइसेहे गड़रियनपुरवा मा एक कंडीडेट एक बूढ़ी औरत से कहिस अम्मा हाथी का ख्याल रक्खेव.. उई अम्मा भड़क गयी.. कहे लागि अये हम बूढ़ औरत तुम्हरे हाथी का कइसे ख्याल रखब.. बकरी होत तो संभाल लेतेन..।

एक तो अपने हिंया कानपूर मा लोगन के पास टाइम बहुत है.. खाली ठाले बइठे कनपुरिये केहू के भी उंगली किया करत हैं.. अइसेहे एक अउर नेता रहे.. श्यामनगर सुजातगंज की तरफ जनसंपर्क करत रहे तबहीं वहीं मोहल्ले केर एक ठो ज्ञानी टाइप फालतू आदमी उई नेताजी का टोंट मारिस कुछु हुईहै नाही.. बस अइसेहे दौड़त रहौ.. उई नेताजी पूछिन कि का भवा.. तो उई कहे लाग यार गुरु यही से निकलत हौ अउर हमरी कुलिया मा नाही आत हौ.. तो कइसे हुईहै..

तुम्हरी सबै दौड़धूप बेकार अगर तुम अन्दर गली मा नाही आयेव.. हम तुमका सबसे मिलवावें.. दस हजार वोट आंय हमरी बिरादरी के हिंया.. अउर ई जौने आपकी लैंडक्रूजर गाडी मा बईठ आपका घुमाय रहे हैं.. देख लिहेव यही लोग गड़बड़ करइहैं.. आपसे कुछौ नहीं चाहि.. बतावे वाली बात रही तो बताय दिया.. कही ई ना समझ लिहेव कि हमका तुमसे सौ पचास चाहि.. अरे आपन शहर के हौ.. बात मन मा आई तो बताय दिया.. एक बात बताय दें भईया.. कल दुपहर मा हमरे घरे आय रहे एक प्रत्याशी..

हमरे पैर पकड़ लीन रहें.. हम झूठ काहे बोली.. उई हमसे कहे लाग कि गाड़ी मा बइठो घरे चलौ.. हमरे साथ खाना खाव.. तुमसे कुछु बात करे का है.. हम कहा अइसा है गुरु.. चुनाव है तो मुंह लगाय रहे हौ .. हम उनका बैरंग लौटाय दिया.. अब देखौ ई सेंट्रो गाड़ी खड़ी आय.. वही दिए हैं.. हम मांगा नहीं.. काहे से हमका कुछु नाहीं चाहि.. उई खुदै दई गए हैं.. बाकी तुम्हारे ऊपर आय.. हमें कुछु ना चाहि.. अब बताव अईस अईस राकेट घूमि रहे हैं मार्किट मा..

वइसे भईया पब्लिक को का चाहि.. रोटी, कपड़ा, मकान, स्कूल, पेट्रोल, मेट्रो, वाईफाई अउर का !! अउर ई सबै कुछ हैं एक मनई के पास.. ओका नाम आय मुकेश अंबानी.. हम तो कहित है भईया ई मुकेश अंबानीये का ही PM बनाय दिया जाय.. काहे से उई करप्शन भी नाही करिहै.. इत्ता पईसा ओके पास खुदै है कि ओके घऱ को जाई सूटकेस लई के.. कि भईया ई एक करोड़ लई लेव अउर हमरा गन्दा नाला वाला ठेका पास करि देव..

अरे इत्ते पईसे की तो नीता भाभी शाम के टाइम सब्जी लेत भये पानीपूरी अउर चाट पकौड़ी खाय जात हुईहैं !!लास्ट मा हम एक्कै बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..