राजू श्रीवास्तव बोले, एक्कै बात कहे चाहित है..होली पे मेलेनिया भौजी रुकतीं तो गुझिया बनाव सीख जउवतीं

दोस्तों कल दुपहरिया मा हमाय मोहल्ले के नत्थूलाल चिल्लावत रहैं.. बताइये साहब.. हमरा तखत गायब है.. हद आय भ्रष्टाचार की!.. हम कहा चाचा एमा भ्रष्टाचार कहां से आय गवा.. तो कहिन अरे घूम फिरि के एके जिम्मेदार भ्रष्ट नेता ही हैं.. फिर शाम का होलिका दहन मा वहै तखत जलत भये देखि के बोले-यार देखे मा तो ई हमरा तखत लागि रहा.. बताव अईस बड़े वाले आंय हमार मोहल्ले के लौंडे.. अच्छा होली मा सबसे जादा परेसान होत हैं जानवर लोगे.. कुत्ता बिल्ली गाय सांड़.. काहे से सबसे पहिले कलर केर ट्राई उनहेन पर होत है

 

जानवर लोगे सोचत होईं कि कऊन सा दिन हमाई जिंदगी मा घुसिगा.. आज के दिन सबै रंगे पुते चेहरे देखौ.. खाली आँखे अउर दांत चमकत हैं.. जइसे कौनो निग्रो होय.. अंधेरे मा देखौ तो लगत है जइसे दुई बलब अउर झालर जलि रही होंय.. अच्छा रंगे पुते होय का फायदौ आय.. केहू के हिंया जाय के एक बार रंगे भये गुझिया मालपुआ खाय आव.. फिर रंग उतारि के एक राउंड अउर पेल देव.. कोऊ पहिचाने ना पहिये.. ई है मजा होली का.. ई आजकल के ट्रेडमिल पे आपन तेल निकाले वाले मेट्रो सिटी के प्राणी का जाने होली की मौज

 

ई लोगे तो त्यौहार वाले दिन भी मिठाई पकवान छोड़ि के हरे पत्ते अउर सलाद खावत हैं.. ई लोगे बॉडी फैट.. फैटबर्निंग.. कोलेस्ट्राल.. लो केलोरी डाइट.. कार्डियोवस्कुलर एक्सरसाइज की दुनिया से बाहरै नाही आना चाहत.. हमका याद आय बचपन मा हम दद्दा के साथे गंगा मेला जात रहन तो बहुत कुछ अड़गम बडगम खात पियत रहन.. बरफ वाला मक्कू.. गैस वाला सोडा वाटर बोतल जेमा कंचा होत रहा.. जब ओका खोलौ तो ठक्क सानी आवाज आत रही.. इमली.. चूरन.. चाट पकौड़ी.. लइया चना केर भेलपूड़ी.. खाजा.. गजक.. पेठा.. सब कुछ पेट के अन्दर.. कौनो डर नाही.. ना हाइजीन का ना फैट का.. अउर कोलेस्ट्राल तो गवा तेल ले.. पहिले होली के पंद्रह बीस दिन पहिले से तैयारी होत रही

 

अब तो सब बाजार से आवत है.. सब आधुनिक हुई गे.. अच्छा जो होली खेलत है ओकी तो मौज आय.. मगर जो लोगे होली नाही खेलत हैं.. उनके लिए तो जइसे आज बाहर कर्फ्यू लाग है.. उई कहत हैं कि बहुतै बेकार त्यौहार आय.. कीचड़ उड़ावत हैं.. नाले मा घुसेड़ देत हैं.. गोबर ग्रीस अउर सिल्वर पोत देत हैं.. खैर ई बात तो सही आय.. आपन पारंपरिक तरीके से रंग अबीर अउर गुलाल से होरी खेलव.. अच्छा एक बात हमरे समझि मा नाही आवत है कि होली वाले दिन होली खेलत भये सब पंचे ई काहे चिल्लावत हैं कि ‘होली है.. होली है’।

 

अउर कौनो त्यौहार पे नाही चिल्लावत कि ‘दिवाली है.. दसहरा है.. नागपंचमी है.. ईद है.. बकरीद है.. क्रिसमस है.. लोहड़ी है’.. खाली होलीयै पे काहे चिल्लावत हैं कि होली है.. सबका याद काहे दिलावत हैं कि कहूँ कोऊ होली वाले दिन धोखे से दिवाली ना मना ले?.. ई बात समझि मा नाहि आवत.. आज होली के दिन सबै टीवी चैनल अउर न्यूज़ चैनल होली के रंग मा रंग जात हैं.. आज के दिन कुछ बुद्धिजीवी टाइप के लोग पानी बचावे का ज्ञान पेलत हैं.. आज होली के दिन कौनो गली नुक्कड़ पे चले जाव.. हुंवा डीजे पे होली का राष्ट्रीय गीत जरूर सुनिहौ.. ‘रंग बरसे भीगे चुनर वाली रंग बरसे’.. ई गाने के बिना होली केर त्यौहार अधूरा आय.. हमाय मोहल्ले मा एक संगीता भौजी रहत हैं।

 

उनके पति उनका दुई साल पहिले तलाक दई दीन रहैं.. आज हम उनसे होली पे मिले तो हम देखे कि उनके तीन बच्चे आंय.. हम कहा भौजी जब तुम्हरा तलाक भवा रहा तो तुम्हरे दुई बच्चे रहैं.. अब तीन कइसे.. तो उई कहिन.. ऽकभी कभी उनका लगत है कि हमका तलाक दई के उनसे पाप हुई गा.. तो त्यौहार त्यौहार माफ़ी मांगे आ जात हैं.. अभीन आधा घंटा पहिले आजौ माफ़ी मांग के गए हैं.. अरे पिछले साल यहै संगीता भौजी होली वाले दिन शाम का सब मोहल्ले के बच्चन का नहिलावत रहीं.. हम देखेन कि ईं सब रंगे पुते लौंडन का पकड़ पकड़ के नहिलाय रहीं.. हम कहा का बात है भौजी.. आजकल कौनो आपन एक बच्चे का नाही नहिलावत है।

 

आप पूरे मोहल्ले के बच्चन का नहिलाय रही हौ.. बढ़िया आय.. तो संगीता भौजी रिसियाय के बोलीं.. कुछौ बढ़िया वढ़िया नाही आय.. हम तो ईं सबका नहिलाय नहिलाय के छाँट रही हन कि एमा से हमरा वाला को आय.. पिछले साल नहिलाना भूलि गयी रहन तो पड़ोस के गुप्ता जी का लौंडा हमरे घरे तीन दिन रहि के गवा रहै.. अच्छा दोस्तों पिछले दिनों ट्रंप भारत आय रहैं.. अरे जब आय रहैं तो होली करि के जातै.. हमका कोऊ बताईस कि ट्रम्प अउर उनका परिवार होली तक इसलिए नाही रुका काहे से उई लोगे खाली दुई जोड़ा कपड़ा ही लाय रहैं।

 

अरे तो का भा.. होली करे रुक जाते.. हमार धोती कुरता लई लेते.. चलौ मानित है ट्रंप बहुत बिजी आंय तो मेलेनिया भौजी अउर ईवांका बिटिया का छोड़ जाते.. होली के बाद हम ई रिक्सा से वापस अमरीका छोड़ अवतेन.. अरे वहू लोग हमरे कानपूर केर लभेड़ी होली हुडदंग देख लेतीं.. कईस होली मा गोबर चलत है.. कीचड.. नाले मा पटक पटक के रंग लगावा जात है.. कोऊ सिल्वर कलर जेब मा भरे घूमि रहा.. तो कोऊ हौदिया बनाय बईठ है.. अउर कानपूर मा तो होली पे नसेबाजी देखे वाली होत है।
 

उई दोनों रूकती तो होली की तैयारी मा हाथ बंटवती.. गुझिया बनवती.. पापड कचरी मिठाई व्यंजन बनवती.. हम उनका सब सिखा देतेन.. फिर उई दोनों अमरीका जाय का ट्रंप भईया का गुझिया पापड़ बनाय के खववती.. ट्रंप भईया की मूंछे तर हुई जात ..लास्ट मा एक्कै बात कहे चाहित है.. कि आप सबै लोगन का होली केर हार्दिक शुभकामनायें अउर हमरी बात ध्यान से सुना करौ..काहे से हमरे घर में हमरी कोई सुनत नहीं है ..