बंद मुट्ठी लाख की.. खुल गयी तो खाक की- राजू श्रीवास्तव

चलो राम राम करि के अयोध्या प्रकरण पे सुप्रीम कार्ट केर फाइनल फैसला आई गवा.. भगवान राम केर मंदिर वहीं बनिहै अउर मस्जिद बनाय खातिर सरकार वहीं अयोध्या मा कहूँ पांच एकड़ जमीन देहे.. मामला सुख सांती से निपटि गा.. वइसे दोस्तों कल भारत बांग्लादेश का मैच रहा.. ई बांग्लादेश का कम ना समझौ... एक तो आजकाल ई पराली उधम जोते है.. इत्ता धुंवा अउर परदूषण हुई गा कि का बतायं.. बताओ मैच से दुई दिन पहिले ई बांग्लादेसी खिलाड़ी आय गे रहैं..

मगर परदूषण के मारे उई सबै मुँहे पर मास्क लगाय के अरुण जेटली स्टेडियम मा प्रैक्टिस करत रहैं.. हम कहा लेव.. जब ई पंचे मास्क लगाय के मैच खेलिहैं तो कइसे पता चलि कि को बौलिंग करि रहा अउर को बैटिंग.. पता चला सबै खिलाड़ी मास्क लगाय मैदान मा घूमि रहे.. हम पहिचानब कइसे कि को खेल के गवा अउर को खेले आवा.. कोऊ बैट्समैन अगर दुबारा आय बैटिंग करे लाग तो कइसे पहिचनियो.. अउर ई मैच पूरे विश्व मा टेलीकास्ट होई तो भारत की कित्ती बदनामी होई.. खैर मैच वाले दिना सबै खिलाड़ी बिना मास्क लगाय खेलत रहैं.. 

अरे पराली ना जलावा करौ भईया.. कौनो अउर दूसर रास्ता ढूंढ लेव.. देखौ दिल्ली मा परदूषण के का हाल हैं.. दिल्ली के मुख्यमंत्री पहिले अकेले खांसत रहैं.. इस समय पूरी दिल्ली खांस रही.. आपन मुख्यमंत्री केर अईस समर्थन हम पहिली बार देखे हन.. अइसेहे तीन लोगे मरे के बाद स्वर्ग मा बइठे बीड़ी पियत रहैं तो एक पूछिस कि तुम कईस मरि के हिंया आयेव.. तो उई जवाब दिहिस हम तो सीरिया के रहे वाले हन.. हुंवा सड़क पे खड़े कुल्फी खात रहन कि कौनो फिदाईन आय बम फोड़ दिहिस..

दूसर आदमी से पूछा गवा तो ऊ बताईस कि हम अमरीका मा रहत रहन.. हुंवा साईंक्लोन वाला तूफ़ान आवा अउर हमका उठाय के हिंया पटक दिहिस.. तीसर आदमी कहिस पता नाहि भईया.. हम तो दिल्ली के रहे वाले हन.. सुबह सुबह बईठ के प्राणायाम करित रहन.. जईसे सांस अन्दर खींचेन.. सारी पराली अन्दर अउर हम इधर.. खैर ई तो रही मजाक वाली बात.. मगर हम एक ठो सीरियस बात बताय रहे हन कि अगर अइसेहे परदूषण बढ़त रहा तो एक टाइम अईस आ जाई कि सबै अपने साथ ऑक्सीजन की बोतल लई के घूमिहैं..

अरे एक ठो अउर गंभीर बात हुई गे दिल्ली के तीस हजारी कोर्ट मा.. हुंवा वकील अउर पुलिस आपस मा लड़ी गे.. मगर एक बात आय कि आपन कानपूर की पुलिसौ अच्छी आय अउर वकीलौ अच्छे आयं.. अइसेहे एक दाईं बड़े चौराहे केर ट्रैफिक सिग्नल पे एक गाडी रेड लाइट जम्प करिस.. पीछे पीछे तीन गाडी वाले भी रेड लाइट जम्प करिन.. ट्रैफिक वाला पहिली गाडी का छोड़ के बाकी तीनो का पकड़ लिहिस.. तो एक पूछिस कि ई का?.. तो पुलिस वाला जवाब दीस कि ऊ वकील रहा.. हमार भाई.. ब्रदर फ्रॉम अनदर मदर..

तो भईया आपन कानपूर मा वकील अउर पुलिस के बीच मा अईस गजब तालमेल आय.. अईस मेलजोल होय के चाहि.. चाहे कुछौ हुई जाय.. काहे से ‘बंद मुट्ठी लाख की.. खुल गयी तो ख़ाक की’.. अगर यहै तालमेल दिल्ली मा वकील अउर पुलिस के बीच होत तो अईस भीषण काण्ड नाहि होत.. ई दुइनो तो अईस भिड़े रहैं जईसे हिंदुस्तान पाकिस्तान.. हमाय एक दोस्त आयं पवन शुक्ला.. चटाई मुहाल मा रहत हैं.. जब से ई दिल्ली वाली घटना भई है उनके हिंया तनाव का माहौल बना भया है..

काहे से पवन शुक्ला आयं वकील अउर उनकी पत्नी हूलागंज पुलिस चौकी मा दरोगा तैनात हैं.. जबसे ई दिल्ली वाला काण्ड भया है तबसे पवन शुक्ला घंटाघर वाले भोजनालय मा खाना खाय रहें अउर आपन घरे केर बरामदे मा चटाई बिछाय सोय रहैं.. वही लाइन फिर कहब कि ‘बंद मुट्ठी लाख की.. खुल गयी तो ख़ाक की’.. दिल्ली वालन की तो मुट्ठीहौ खुलि गे अउर कईयन की खोपड़ीहौ खुलि गे.. अरे तुमसे अच्छा व्यवहार तो हमरे कानपुर के टेम्पो वालन का आय..

अइसेहे हमाय साढू आयं चन्दन.. प्रेम नगर मा रहत हैं.. बहू वकील आयं.. एक दफा हम उनसे मिले कचहरी गे तो उई आपन बस्ता मा मिले नाहि.. कौनो कोर्ट मा हाजिरी लगावे गे रहैं.. हम कहा चलौ अइसेहे कचहरी घूमा जाय.. भीषण गरमी केर टाइम रहा.. प्यासौ लगत रही तो हमका सामने एक ‘बार’ दिखा.. हम वहै मा अन्दर घुसि गे.. हुंवा एक काला कोट पहिने वेटर आवा अउर पूछिस का चाहि?.. हम कहा एक ठो बियर लै आव एकदम कड़क ठंडी..

ऊ भड़क गवा.. कहे लागा कि का पगलाय गे हौ का?.. ई ‘बार काउंसिल’ आय.. दारू बियर वाला बार नाहि.. खैर तब तक हमार साढू चन्दन भी हमका सूँघत सूँघत आय गे अउर हुंवा से निकार के लई गे.. बाहर निकरि के चन्दन हमसे कहिन आज बचि गयेव नाहि तो बहुत पेले जातेव.. लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है।