धोनी क्रिकेट मा रहैं या फौज मा.. मरिहैं तो छक्के ही- राजू श्रीवास्तव

दोस्तों परसों हम संकठा, बैजनाथ, मनोहर अउर गजोधर सीसामऊ वाले मुन्ना चिमिरखी केर छत पे बइठे रहन तो अइसेहे बात चले लाग कि आपन देस बहुत तरक्की पे आय.. चंद्रयान निकरि गा.. चांद पे पहुंचे वाला आय.. चंद्रयान चांद पे उतरे से पहिले अंतरिक्ष से रिपोर्ट भेजिस आय कि इत्ते सालन से जो बॉलीवुड मा चांद पे गाना चलत रहे.. उई सब फर्जी बात रही.. अईस कुछौ नाहि आय.. बताओ एक गाना रहा ‘चांद सी महबूबा मेरी’..

तो भईया चंद्रयान वाली टीम बताईस है कि अईस कुछौ नाहि.. केहू केर महबूबा चांद से नाही मिलत.. एक ठो गाना अउर आय ‘मैंने पूछा चांद से के देखा है कहीं.. मेरे यार सा हसीं’.. तो भईया ई धरती वाले इत्ता परदूषण फैलाय हैं कि उप्पर चांद से धरती की तरफ कुछौ नाहि दिखत.. तबहीं मुन्ना चिमिरखी कहिन कुछौ कहौ आजकाल महिलाएं बहुत आगे जाय रही हैं.. अब देखौ दाल चावल खाय वाली लड़कियां गोल्ड मैडल जीत रही हैं .. तो रेलबाजार वाले संकठा बोलि पडेे़ हां, ई बोर्नवीटा अउर कॉम्प्लान खाय वाले वाले लड़का लड़की का करि रहे हैं ..

हम कहा उई लोगे टिकटोक पे वीडियो बनाय रहे.. पबजी खेल रहे अउर हुक्का बार मा शीशा पी रहे.. तभीन गुजैनी वाले मनोहर कहिन वइसे ई चंद्रयान वाली टीम मा भी महिलाओं का जोर जादा आय.. बढ़िया आय.. साइंस तरक्की पे आय.. इस पे घुमनी बाजार वाले गजोधर बोलि पड़े.. साइंस चाहे जित्ती तरक्की करि ले.. मगर ई बात का पता कबहूं पता नाहि लगाय सकत कि शी शी की आवाज सुनि के बच्चा सू-सू कईसे करि देत है.. इस पे शिवाले वाले बैजनाथ बोले हां, सही कहेव.. चाहे कित्ती भी टेक्नोलॉजी आय जाय..

मगर साइकिल के टायर की छुच्छी पे थूक लगाय के चेक करना कि हवा निकरि रहि कि नाही.. विश्व केर सारे वैज्ञानिक हैरान हैं .. तबहीं गजोधर कहिन सुना है अब बिना ड्राईवर चले वाली कार आय वाली हैं.. इस पे संकठा बोले.. ऊ सब ठीक आय.. मगर मानि लेव अईस कार से कौनो का एक्सीडेंट हुई जाय तो लतियावा केका जाई.. ई चिंता आज काल पूरे रेलबाजार मा चलि रहि कि एक्सीडेंट के बाद फिर हौंका केका जाई.. इस पे मनोहर कहिन यार हौंके वाली बात से याद आवा कि अभीन तीन दिन पहिले हमार गुजैनी मा लल्लू किराने वाले का टिल्लू बतासे वाला हौंक दिहिस..

ओका मारि मारि के तिरछा करि दिहिस.. हम टिल्लू से पूछेन एका काहे मारव बे.. तो टिल्लू बताईन कि बरसात मा कमरे के अंदर कपडे़ सुखावे खातिर इससे रस्सी मांगेन तो ई कहिस का रस्सी मा लटक के जान देहौ का?.. बताव इत्ती सी बात पे टिल्लू क्रिकेट वाले बैट से ओकी फ्री स्टाइल सुताई करि दिहिन.. अच्छा हां !!.. क्रिकेट से याद आवा कि सुना है धोनी फौज मा ट्रेनिंग लई रहे हैं .. तो हम कहा धोनी की बात निराली आय.. धोनी क्रिकेट मा रहैं या फौज मा.. मरिहैं तो छक्के ही !!..

वईसे दोस्तों हमका याद आय कि हमार अम्मा कभूं तीरंदाजी मा पदक नाहिं लायीं अउर ना कबहूं निशानेबाजी मा भाग लिहिन.. फिर भी जब-जब उई चप्पल खींच के हमका मारत रहीं तो उनका निशाना कभूं चूकत नाहीं रहा.. अईस जबरदस्त निसाना रहा उनका.. आज हम उनकी मार, प्यार, दुलार याद करि के रोवत हन.. हमका भावुक देखि के बैजनाथ कहिन अरे यार तुम्हरी तो आंख भरि आई हो.. फिर हमरा ध्यान बंटावे खातिर मनोहर कहिन..

अच्छा ई बताव हथेली मा खुजली मचे तो एका का मतलब आय? .. हम कहा एके लिए तो सबै कहत हैं कि अगर हथेली मा खुजली होय तो मतलब धन प्राप्ति केर योग आय.. तबहीं गजोधर बोले अच्छा.. हथेली खुजलावे तो मतलब पईसा मिले वाला आय.. अउर पूरा शरीर खुजलावे तो एका का मतलब .. हम कहा भाग बे.. तोका खुजली रोग भवा आय.. सीधे डॉक्टर के पास जाव.. बारिश का टाइम आय..। लास्ट मा एक्के बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है।