तुम्हरे पास कौनो ऐब होंय या ना होंय.. मोबाइल मा एप जरूर होयं- राजू श्रीवास्तव

दोस्तों बहुत जल्द ई टेलीवीजन नाम की वस्तु खतम हुई जाई.. बस तीन चार साल का खेला आय.. ई टेलीवीजन का चलि चला का खेला आय..आये वाले टाइम मा कोऊ टेलीवीजन ना देखिये.. सब मोबाइल देखि हैं.. मोबाइलै के अन्दर सब होई.. जो टेलीवीजन दिखि हैं ओका मोहल्ले वाले थुकि हैं.. ओका पिछड़ा भवा माना जाई.. ओके घर का कोऊ पानी ना पीहै.. कहि हैं कि ऊ बहुत पिछड़े आदमी आंय.. अब देखौ आजका, सबै मोबाइल मा अईस अईस जौन जौन देखत हैं.. का कहत हैं..

हां वही अमाजौन मा देखति हैं.. अउर नेटफ्लिक्स मा देखति हैं.. बस आये वाला टाइम ऑनलाइन का हुई है.. ई टाकीज अउर थिएटर सब खंडहर हुई जइ हैं.. अउर सब टीवी चैनल केर हालत अईस हुई जाई जइसे बीएसएनएल.. हुई हैं तो मगर कौनो औकात ना होई.. एक टाइम रहा जब स्टार प्लस वाले दूरदर्शन वालन का अपने पास नाही बइठावत रहैं.. कहत रहैं तुम नीचे जमीन पे बईठो.. वइसेहे अब अमाजौन अउर नेटफ्लिक्स वाले ई स्टार अउर कलर चैनल वालन का साथ नाही बइठे दे हैं..

कहियें कि इन लोगन का खाना अलग लगवाव तब हम लोगे खइ बै..। सही बात आय.. आजकाल सबै लोगे टीवी मोबाइल मा देखि रहे हैं तो आय वाले टाइम मा अइसेहे होई.. अउर मोबाइलौ की सुनि लेव.. अब जो काम करि वो आगे जाई.. पहिले की तरह नाहीं कि लगे हैं खींचे मा.. अब राजा केर बेटा राजा ना बनि.. जो काम करि वहे राज करि.. जौन लोग 11-12 सौ वाले मोबाइल लिए घूमि रहे हैं.. जेमा एक्कौ एप नहीं ना.. आय वाले टाइम मा उनके हाथ का कोऊ पानी ना पी है.. अरे जिंदगी बेकार आय अगर मोबाइल मा एप ना होंय.. एप के बगैर का धरा.. तुम्हरे पास कौनो ऐब होंय चाहे ना होंय मगर मोबाइल मा एप जरूर होयं के चाहि..

जेतने पुरनिया मोबाइल आंय सब चूल्हे मा झोंके जांई.. इत्ता तेज जमाना आय वाला है.. अब मोबाइल का चार्ज करे खातिर पिलग या तार वार ना लगी.. अइसेहे धूप मा राखि देव चार्ज हुई जाई.. चार्ज से याद आवा कि अब अईस कार आय वाली आय जेमा डीजल पेट्रोल की जरूरत नाही पड़ि है.. अब कार बिजली से चलिहै.. मानो कहूं केहू के घर गे.. कहा चाची नमस्ते.. वो कार का चार्जर दई देव पहिले.. उई पूछि हैं अये बच्चा कौन गाड़ी है तुम्हार.. चाची बीएमडब्लू.. अये बीएमडब्लू वाला चार्जर तो नाही है.. पता चला लोग कहि हैं..

अरे उनके हिंया से रिश्ता ना कियेव.. हम लोगे दुई घंटा उनके हिंया बइठे रहन.. मगर चार्जर नाही मिला रहा.. कौनो चार्जर का नाही पूछिस.. अरे रिश्ता भा रहा अगरवालन के हिंया.. हम लोगे गे रहन.. तो हुंवा दरवज्जे परसेहे लाइन से चार्जर लगे रहैं.. हम लोगे नाश्ता करत रहन तो हम्म्म्म की आवाज आत रही.. हम कहा का है तो कहिन सब कारें चार्ज हुई रहीं.. बाद मा अंगूठी पहिनात टाइम भी हम्मम्मम्म.. अईस इन्तिजाम रहा.. अउर ई घंटाघर वाले अवस्थी का लई लेव.. बातें करत हैं बड़ी बड़ी ..

कहत हैं हमरे पास चार कार हैं.. मगर चार्जर उनके हिंया दुई हैं.. अईस घर मा सादी करे का कोऊ मतलब आय.. अरे बजरिया वाले पुत्तू तिवारी की बरात मा गे रहन हमीरपुर.. हुंवा हर ब्रांड के चार्जर लगे रहे.. बरात जब उठी तो ठेला पे चार्जर चलत रहैं.. हर लाइट हंडा वाले के बाद एक चार्जर रहा.. अउर जहां बरात ठहराईन रहें.. हुंवा भी खूब चार्जर चले हैं.. खटिया कम रहीं चार्जर जादा रहैं.. पॉवर बैंक भी रहें. बड़े बड़े बमपिलाट हलब्बी हलब्बी.. अपने संगीत टाकीज वाले कल्लन तो एक पॉवर बैंक के उप्परै चद्दर डार के सोय गे रहें.. खूब बड़े बड़े  पॉवर बैंक रहें खटिया बरब्बर..

बाद मा गरम लगा तो भागे.. बिदाई के टाइम पता चला कि दूल्हे का कार मिलि है.. हम कहा एमा कौन बड़ी बात आय.. कार तो सबै देत हैं.. पर उई दिहिन उड़े वाली कार.. हम पंचे अईसे देखत रहैं.. पुत्तू तिवारी आपन दुल्हन का कार मा बईठाइन अउर उड़ के सीधे गोवा निकसि गे..। लास्ट मा एक्कै बात कहे चाहित है.. कि हमरी बात ध्यान से सुना करौ..काहे से हमरे घर में हमरी कोई सुनत नहीं है।