चुनावी महाकुंभ पर बोले राजू श्रीवास्तव...एक ठो धोती अउर एक पउव्वा खातिर आपन ईमान ना बेचेव

दोस्तों प्रयागराज वाले कुंभ केर बाद अब शुरू भवा है चुनाव केर महाकुंभ... पूरे देस मा आचार संहिता लागि गे.. आचार संहिता मतलब अब से कौनो नेता जी के पैर ना छुईहै.. अब नेताजी सबके पैर छुईहैं.. ई आचार संहिता का सुनि के गड़रियन पुरवा वाले संकठा हमसे कहे लाग कि राजू भईया ई कउन सा अचार होय..

ई कईस खावा जात है.. इस से पहिले कि हम उनका जवाब दई.. पटकापुर वाले गुप्ता उस से कहिन अबे . ई उई अचार होय जेका संगीता नामक महिला बनाईस है अउर ई अचार गीता नामक महिला के संगे बईठ के खावा जात है.. अचार-संग-गीता.. हम कहा गुरु स्कूल मा पढ़े संधि विच्छेद केर अईस गजब प्रयोग किये हौ कि ससुर बुद्धि संट करि दिहेव.. हम कहा छोड़ो ई सब.. तुम हमका ई बताव कि अबका वोट केका देहौ.. तो गुप्ता कहिन गुरु वोट तो हम मोदी का ही देबे..

अउर तब तक मोदी जी का वोट देबे जब तब उई हमार खाता मा पंद्रह लाख ना दई दें.. काहे से हमहूं मोदी जी की तरह जिद्दी हन.. हम संकठा की औरतिया से पूछा कि भाभी अबकी बार केका वोट देहौ तो उई तीन बालिस घूंघट के अन्दरे से जवाब दिहिन.. हम तो नई नई बियाह के आई हन.. हमरे आदमी जेका कहियें ओका दई देबे.. तबहीं गुप्ता कहिन अरे राजू भईया कल चुन्नीगंज मा एक चुनावी सभा होत रही तबहीं ऊपर लगा पंखा मंच पे फाट पड़ा अउर भाषण देत नेता जी के बगल मा गिरा..।

वो तो कहौ उई बचि गे खाली जरा सा हाथ मा लगा .. हम कहा हां.. नाही तो चुनावी रिजल्ट से पहिलेहे उनकी जमानत जब्त हुई जाते..तबहीं संकठा बोले अरे ई तो कुछौ नाही.. अभीन परसों अर्मापुर मा एक चुनावी सभा होत रही.. हुंवा तो पूरा मंच मय पिंडाल के भरभराय के गिरि गवा रहै.. मंच के नीचे कुछ कुत्ते बइठे रहैं.. उई कुत्ते नेता लोगन का बरकोट खाईन.. अब उई लोग रोज हैलट मा जाय के सुई लगवाय रहे हैं  हम कहा आजकाल चुनावी रैली केर धूम होय.. अइसे बहुत से लोग हैं जो रैली मा जात हैं मगर उनका पतेन नाही होत है कि ई किकेर अउर कौने पार्टी केर रैली होय..।

अइसेहे लखनऊ मा एक रैली मा हम एक आदमी से पूछा कि तुम केके साथ आय हौ.. तो उई कहिन कि हमका ई हमाय मोहल्ले के मिसरा जी साथ लै आय हैं.. हम मिसरा जी से कहा कि तुमका को लावा तो कहिन हमका चौरसिया लाय हैं.. हम चौरसिया का पूछा कि तुमका को लावा तो उई कहिन कोऊ तो रहा.. बड़ी बड़ी मूंछ रही ओकी.. कहत रहा संगे चलौ तुमका पूड़ी कचौड़ी खवइबै.. कोल्डड्रिंक पिअइबै.. उई मुच्छड़ हमका घुमाईस.. लखनऊ हवाई अड्डा भी दिखाईस.. मगर अब उई खुद नाही दिख रहा.. अब हम लोगन केर टेंसन ई है कि हम लोगे वापस नौबस्ता कइसे जइबै.. तबहीं गुप्ता कहिन गुरु सुना है कि अबकी चुनाव कई चरण मा हुईहैं ..।

हम कहा हां पहिले नेता लोग आपके चरणों मा हुईहैं.. बाद मा पांच साल तक आप लोग उनके चरणों मा हुईहौ.. अउर देखौ भईया एक बात बताई.. चुनाव केर दौर आय.. इन्सान का बच्चा बनौ.. राष्ट्र केर सवाल आय.. आपन वोट अइसेहे कौनो लम्पट के हाथ मा ना पकड़ाय दिहेव.. वोटिंग से पहिले ई नेता लोग खूब उपहार बंटिहैं.. कोऊ साड़ी बटिहैं कोऊ चप्पल उपहार.. कुछ लोग पईसा के साथ दारू देहे.. अइस टाइम पे नकली दारु बहुत चलत है.. ई सब ना लिहेव.. अउर मान लेव अगर लई भी लेव तो एक ठो धोती अउर एक पउव्वा दारु खातिर आपन ईमान ना बेचौ.. उनकी दी भयी धोती कित्ता चली !!..

ई सरकार चली पांच साल.. अगर देस केर बागडोर गलत हाथन मा चली गे तो उई एक धोती दई के पांच साल तक तुम्हार खाल तक उतार लेहें..। तो आपन कीमती वोट आपन विवेक से अउर ईमानदारी से ओका दिहेव जौन ओका हकदार होय.. देस खातिर इत्ता तो करै सकत हौ..लास्ट मा हम एक्कै बात कहे चाहित है कि हमरी बात ध्यान से सुना करौ..काहे से हमरे घर में हमरी कोई सुनत नहीं है ..।