गरीबन का सब्सिडी.. अमीरन का रिबेट.. मिडिल क्लास टीवी देखौ.. तुमका मिली डिबेट- राजू श्रीवास्तव

नमस्कार दोस्तों, हमरे सबै मुस्लिम भाई बहिनन का बहुत बहुत ईद मुबारक.. ई दफा कोरोना सब छियाछापट किये है तो आप सबै लोगे घरे ही रहेव.. अरे हमहूं का खल रहा है कि बताव आज ईद आय.. आज के दिन सिंवई अउर पकवान सूते का मौका रहत है मगर सब लोग आपन आपन घर मा ठूंठ बने बईठ हैं.. मगर कौनो बात नाही.. जिन्दगी मौका देहे तो अगले साल खूब जोर शोर से ईद मनावा जाई.. हमका लगत है कि ई ससुर लॉकडाउन मोदी जी की बात का गंभीरता से लई लिहिस है..

 

अब ई लॉकडाउन भी आत्मनिर्भर हुई गा.. अब जब एकी इच्छा होई.. तबै खुलिहै.. अभीन परसों हमका हार्टअटैक आत आत बचा.. हुआ ई कि हमरे पड़ोस मा रहत हैं रग्घू.. उई परसों सुबह आय अउर हमरी गाड़ी की चाबी मांगिन.. कहै लाग कि हमका मॉलरोड के एक लैब से रिपोर्ट लाय का है.. हम कहा ठीक है.. रग्घू दुई घंटा बाद आय अउर हमका गाड़ी की चाभी दिहिन अउर लपक के गले लगी गे.. कहे लाग बहुत बहुत धन्यवाद..  ई कहि के आपन घरे की तरफ बढ़िगे..

 

तो उनकी पत्नी बाहरै खड़ी उनका इंतिजार करत रही.. रग्घू उससे जोर से कहिन रिपोर्ट पॉजिटिव आयी है!.. ई बात सुनिके हमरे आंखन के सामने अंधेरा छाय गवा.. हम गिरत-गिरत बचेन.. घबराय घबराय तुरंत हम आपन हाथ सैनिटाइजर से साफ किये.. फिर गाड़ी का दुई बार धोया.. तबहीं हमका याद आवा कि हमका गले भी लगावा रहै.. हमरे मन मा एक चीख सी उठी कि बेटा राजू गयेव काम से.. फिर हम तुरंत बाथरूम मा घुसेन अउर साबुन से रगड़-रगड़ के नहायेन अउर बाथरूम के एक कोने मा दु:खी होय के बईठ गएन..

 

फिर थोड़ी देर के बाद हम रग्घू का फोन करि के कहा कि यार अगर तोहार कोरोना रिपोर्ट पॉजिटिव रही तो कम से कम हमका तो बख्श देतेव.. रग्घू जोर-जोर से हंसे लाग.. कहिस अरे दद्दा उई रिपोर्ट कोरोना की नाही रही.. ऊ रिपोर्ट तो हमार मेहरारू की प्रेग्नेंसी की रिपोर्ट रही.. जो पॉजिटिव आयी है.. हर चीज कोरोना थोडे होत है.. वइसे आजकाल जइसेहे जेब से सेनिटाइजर की बोतल निकालो तो बाकी के लोग अईसे हाथ बढ़ाय देत हैं.. जइसे तम्बाकू बंट रही होय.. अच्छा ई कोरोना तो रुकै का नामै नाही लईरहा..
 

अगर कोरोना पॉजिटिव अइसेहे बढ़त रहे तो.. कोरोना नेगेटिव वालन का क्वारंटाइन करना पड़िहै.. ई ससुर कोरोना वायरस एकदम हिरण्यकश्यप जईसा हुई गवा है.. ना जल में मरूं.. ना थल में मरूं.. ना आकाश में मरूं.. ना पाताल में मरूं.. ना अंदर मरूं.. ना बाहर मरू.. ना मनुष्य से मरूं.. ना पशु से मरूं.. ना दैत्यों से मरूं.. ना देवगणों से मरूं.. ई खाली सोशल डिस्टेंसिंग से मरी.. अच्छा पहिले जब कमाय जात रहन तो ठंडी रोटी मिलत रही.. आजकाल निकम्मे की तरा घरे बईठे है तो गरमा गरम रोटियां मिल रही है..

 

यहू प्रभु की लीला आय.. अच्छा कल संकठा की मेहरारू संकठा का दौड़ा लीन.. सबकी तरह संकठा भी घर के काम करि रहे हैं तो उनकी पत्नी बोली कि एक महीना लॉकडाउन अउर चलि जाय तो हम तुमका घर के सारे काम मा माहिर बनाय देबे.. संकठा बोले कि फिर कोई अच्छी सी लड़की देखि के हमरे हाथ भी पीले करवाय दिहेव.. बस ई सुनते ही संकठा की औरत फुंकनी चिमटा लई के दौड़ाय लीस.. उनके हाथ पीले तो नाही मगर मार मार के नीले जरूर करि दिए गए.. वइसे ई लॉकडाउन मा दुई चीजैं बहौत काम आई.. एक तो लूडो अउर दूसर बरमूडो..

 

इधिर ये स्कूल कॉलेज वालन का अलग चालि रहा.. ऑनलाईन पढ़ावे की नौटंकी.. अरे भईया जब स्कूल में पढ़ाया भया बच्चन का बिगैर ट्यूशन कोचिंग के समझ मा नाही आत.. तो ई ऑनलाइन पढ़िके का खाक समझि हैं.. आजकाल नया दोहा मारकीट मा चालि रहा.. गरीबन का सब्सिडी मिली.. अमीरन का मिली रिबेट.. मिडिल क्लास तुम टीवी देखौ.. तुमका मिली डिबेट..!! भईया जिंदगी संभाले खातिर पूरी जिंदगी पड़ी है.. अभी तो वा टाइम संभाल लेव जहां अब जिंदगी खड़ी है.. घर पर रहे.. स्वस्थ रहे.. मस्त रहे.. मुस्कुराते रहे।